Վրաստանի նախագահը հաստատել է Գիորգի Գախարիային վարչապետի պաշտոնում

Վրաստանի նախագահ Սալոմե Զուրաբիշվիլին հրամանագիր է ստորագրել Գիորգի Գախարիային վարչապետ նշանակելու մասին. հայտնում է նախագահի վարչակազմը:

Գախարիան երկրորդ անգամ է դարձել վարչապետ: Հինգշաբթի նա խորհրդարանին ներկայացրել էր կառավարության նոր կազմը և կառավարության ծրագիրը: Օրենսդիր մարմինը ձայների մեծամասնությամբ վստահության քվե էր տվել նրան:

«Վրաստանի Սահմանադրության 56-րդ հոդվածի 5-րդ կետի համաձայն` Գիորգի Գախարիային նշանակել Վրաստանի վարչապետ»,- ասվում է կարգադրության մեջ:

Իշխող «Վրացական երազանք» կուսակցությունը հոկտեմբերի 31-ին կայացած խորհրդարանական ընտրություններից հետո ստացել է խորհրդարանի 150 տեղերից 90-ը:

Նոր ձևավորված կառավարության անդամներն են՝

• Տարածքային զարգացման և ենթակառուցվածքների նախարար Մայա Ցքիթիշվիլին,
• Արդարադատության նախարար Գոչա Լորթքիփանիձեն,
• Ներքին գործերի նախարար Վախթանգ Գոմելաուրին,
• Էկոնոմիկայի և կայուն զարգացման նախարար Նաթիա Թուրնավան,
• Արտաքին գործերի նախարար Դավիթ Զալկալիանին,
• Ֆինանսների նախարար Իվանե Մաճավարիանին,
• Կրթության, գիտության, մշակույթի, սպորտի նախարար Միխեիլ Չխենկելին,
• Բռնի տեղահանվածների, աշխատանքի, առողջապահության, սոցիալական  պաշտպանության նախարար Էկատերիե Տիկարաձեն,
• Գյուղատնտեսության և շրջակա միջավայրի պահպանության նախարար Լևան Դավիթաշվիլին,
• Պաշտպանության նախարար Իրակլի Ղարիբաշվիլին,
• Հաշտության և քաղաքացիական հավասարության պետնախարար Թեա Ախվլեդիանին։