Առաջին 5000 ամերիկացի զինվորականները կլքեն Աֆղանստանը 5 ամսվա ընթացքում

ԱՄՆ-ի և «Թալիբան» ծայրահեղական խմբավորման միջև համաձայնության շրջանակներում առաջին 5000 ամերիկացի զինվորականները կլքեն Աֆղանստանի տարածքը 5 ամսվա ընթացքում։ ԱՄՆ հատուկ դեսպանորդ Զալմայ Խալիլզադը աֆղանցի նախագահին ցույց է տվել համաձայնագրի նախագիծը և հայտարարել, որ իրենք Ամերիկայի ամենաերկարատև պատերազմի դադարեցման շեմին են․ հայտնում է AP-ն։

Նշվում է՝ Խալիլզադը երկու անգամ հանդիպել է նախագահ Աշրաֆ Հանիի հետ Կատարից վերադառնալուց հետո, որտեղ ավարտվել է ԱՄՆ-ի և թալիբների միջև բանակցությունների իններորդ փուլը։

«Մենք սկզբունքորեն համաձայնության ենք եկել թալիբների հետ, սակայն, իհարկե, մինչև ԱՄՆ նախագահը հավանություն չտա դրան, այն վերջնական չի  կարող լինել»,- տեղական TOLO հեռուստաալիքի հետ զրույցում ասել է Խալիլզադը ու մանրամասնել, որ, ըստ համաձայնագրի, առաջին 5000 ամերիկացի զինվորականները Աֆղանստանի հինգ բազաներից դուրս կբերվեն 135 օրվա ընթացքում։ Այս պահի դրությամբ երկրում հաշվվում է մոտ 14 000 ամերիկյան զինծառայող։

Ակնկալվում է, որ զորքերի հետագա դուրսբերումը կախված կլինի գործարքի պայմաններից՝ ներառյալ բռնության նվազումը։

Թալիբները վերահսկում են երկրի մոտ կեսը։ Իր հերթին, ԱՄՆ-ը ձգտում է, որ թալիբները հավաստիացնեն՝ Աֆղանստանը ապաստան չի դառնա ծայրահեղական խմբավորումների համար, որոնք ծրագրում և իրականացնում են ահաբեկչական գրոհներ։

Աֆղանական կառավարությունը չի մասնակցել ԱՄՆ-ի և թալիբների բանակցություններին, քանի որ իրենք մերժում են թալիբներին որպես ԱՄՆ-ի խամաճիկների։ Այնուամենայնիվ,  համաձայնագրի կնքումից հետո տեղի կունենան ներաֆղանական բանակցություններ։