Թուրքիան թող մտքի ծայրով անգամ չանցկացնի հորատման աշխատանքները. Ցիպրաս

Հունաստանի վարչապետի ժամանակավոր պաշտոնակատար Ալեքսիս Ցիպրասը զգուշացրել է Անկարային Միջերկրական ծովի արևելյան ջրերում հորատման աշխատանքների վերաբերյալ. հաղորդում է evrensel.net կայքը:

Միջերկրական ծովի արևելյան ջրերում Թուրքիայի կողմից բնական գազի հորատման աշխատանքների արդյունքում առաջացած ճգնաժամի համար ԵՄ-ից Թուրքիայի նկատմամբ պատժամիջոցներ պահանջող Ալեքսիս Ցիպրասը հարցազրույցի ժամանակ Թուրքիային զգուշացրել է զերծ մնալ հորատման աշխատանքներ կատարելուց:

«Թուրքիան թող իր մտքով անգամ չանցկացնի Կաստալերորիզոյի շրջակայքում անցկացնել հորատման աշխատանքներ: Թուրքիան չունի թույլտվություն հունական տարածքներում բնական գազի և նավթի որոնողական աշխատանքներ կատարելու համար»,- հայտարարել է նա և նշել, որ ԵՄ-ի կողմից Թուրքիայի գործողությունները անօրինական ճանաչելը Հունաստանի և Կիպրոսի մեծ դիվանագիտական հաղթանակն է:

Նշենք, որ Թուրքիան Կիպրոսի հատուկ տնտեսական գոտում որոնողական աշխատանքները սկսել էր մայիսի 6-ից` այնտեղ ուղարկելով «Ֆաթիհ» նավը, իսկ օրեր առաջ, չնայած միջազգային կառույցների և գերտերությունների հակազդեցությանը, ուղարկեց նաև երկրորդ` «Յավուզ» նավը:

Ի դեպ, նավեր կրում են օսմանյան հայտնի սուլթաններ Մեհմեթ II Նվաճողի (Ֆաթիհ` Կոստանդնուպոլիսը նվաճող սուլթանը) և Սելիմ I Ահեղի (Յավուզ) անունները: