Մտքիս ծայրով էլ չի անցնում. Հովիկ Աբրահամյանը՝ նախագահ դառնալու մասին

ԱԺ նախագահ Հովիկ Աբրահամյանը ՀՀԿ ԳՄ նիստից հետո լրագրողների հետ զրույցում, պատասխանելով Yerkir.am-ի հարցին, եւս մեկ անգամ վստահեցրեց, որ ՀՀԿ-ում թեւեր, կլաններ չկան: «Չկան եւ չեն կարող լինել նման թեւեր, ՀՀ նախագահը թույլ չի տա, որ նման թեւեր ձեւավորվեն»,- հայտարարեց նա:

Մեր թղթակցի դիտարկմանը, որ արդեն իսկ մամուլը գրում է, որ ՀՀԿ-ն պատրաստվում է հաջորդ նախագահական ընտրություններին, եւ որ Սերժ Սարգսյանը փորձում է լուծել իր ժառանգորդի խնդիրը, որ հենց այս համատեքստում էլ ակտիվացել են ԱԺ նախագահի ու վարչապետի միջեւ առկա հակասությունների մասին խոսակցությունները, Հովիկ Աբրահամյանը հակադարձեց. «Ես նման ցանկություն չունեմ (նախագահ դառնալու ցանկություն-խմբ.):  Ուրիշի փոխարեն չեմ կարող կարծիք հայտնել: Նման ցանկություն նույնիսկ իմ մտքի ծայրով չի էլ անցնում»:

Հարցին` եթե Սերժ Սարգսյանն իրեն նախագահ դառնալու մասին խնդրի մտածել, կմտածի՞, ԱԺ նախագահը կատակեց. «Նախ պետք է ճշտեմ՝ Սերժ Սարգսյանը կմտածի՞ նման բան, որ ես էլ մտածեմ»:

Yerkir.am-ի այն հարցին էլ՝ իսկ վարչապետը նախագահ դառնալու ցանկություն ունի՞, Հովիկ Աբրահամյանը պատասխանեց. «Ինձ չի ասել»:

Լրագրողները Հովիկ Աբրահամյանից փորձեցին պարզել նաեւ, թե հնարավո՞ր է կրկին պաշտոնանկ լինի, ի պատասխան նա նշեց, որ ամեն ինչ էլ հնարավոր է, բայցեւ ընդգծեց, որ նման հարց չի քննարկվել:

ԱԺ նախագահն անդրադարձավ նաեւ իր դեմ մամուլում տպագրվող նյութերին՝ դրանք համարելով պատվեր, նաեւ նշեց, որ դրանք այնքան պարզ եւ պրիմիտիվ են, որ պատվիրատուները պետք է ամաչեն դրա համար, ավելի լավ է նորմալ գործերով զբաղվեն, իրենց ընտանիքներով: 

«Ձեր միջոցով պատվիրատուներին ուզում եմ ասել, որ ես ամեն ինչ գիտեմ, գիտեմ, թե ում միջոցով են պատվիրվում այդ նյութերը, բայց չեմ կարող ասել»,- հայտարարեց նա: