Մոսկվան Մոլդովայում տիրող իրավիճակի շուտափույթ կարգավորման հույս ունի

Մոսկվան հույս ունի, որ Մոլդովայում տիրող քաղաքական իրավիճակը շուտափույթ կկարգավորվի: Այդ մասին, ըստ РИА Новости-ի, ասվում է ՌԴ ԱԳՆ-ի հայտարարությունում:

Նշվում է, որ ճգնաժամի լուծման միակ ճանապարհը բոլոր քաղաքական ուժերի միջև երկխոսությունն է:

Մոլդովայի սոցիալիստների կուսակցությունը, որը ռուսամետ է, և եվրոպամետ ACUM դաշինքը շաբաթ օրը խորհրդարանական մեծամասնություն են կազմել: Երկրի Սահմանադրական դատարանը այդ որոշումն անօրինական է համարել: Կիրակի օրը Պավել Ֆիլիպը, որին դատարանը նշանակել է երկրի ժամանակավոր ղեկավար, հրաման է ստորագրել խորհրդարանի ցրման և սեպտեմբերի 6-ին ընտրություններ անցկացնելու մասին:

Նոր կառավարությունը հայտարարել է, որ մինչ այդ իշխող Դեմոկրատական կուսակցությունը ցանկանում է դատավորների միջոցով ուզուրպացնել իշխանությունը: