Ռուսաստանի ԱԳՆ–ն հայտնել է, որ Մոսկվան Հայաստանում իրավիճակի շուտափույթ կարգավորման հույս ունի

Հայաստանում իրավիճակն այդ երկրի ներքին գործն է։ Ռուսաստանը շահագրգռված է, որ այնտեղ իրավիճակը հնարավորինս շուտ կարգավորվի: Այս մասին չորեքշաբթի լրագրողներին ասել է Ռուսաստանի Դաշնության արտաքին գործերի փոխնախարար Անդրեյ Ռուդենկոն՝ պատասխանելով ՏԱՍՍ-ի հարցին:

«Մենք դա համարում ենք Հայաստանի ներքին գործ: Մենք չենք միջամտում այդ գործընթացներին, որոնք տեղի են ունենում այնտեղ և չենք պաշտպանում կողմերից մեկին։ Մենք ուզում ենք, որ իրավիճակը նորմալանա, քանի որ դա օգուտ կտա բոլորին»,- ասել է նա՝ հավելելով՝ Ռուսաստանը հույս ունի, որ իրավիճակը Լեռնային Ղարաբաղում չի սրվի:

«Հուսով ենք, որ դրան չի հասնի»,- ասել է դիվանագետը՝ պատասխանելով համապատասխան հարցին: