Քոչարյանի պաշտպանի բողոքը քննող դատավորը հեռացել է խորհրդակցական սենյակ՝ որոշելու իր դեմ ներկայացված ինքնաբացարկի հարցը

Այսօր ՀՀ վերաքննիչ քրեական դատարանում, նախագահությամբ Վազգեն Ռշտունու, շարունակվել է անձեռնմխելիության հիմքով ՀՀ երկրորդ նախագահ Ռոբերտ Քոչարյանի  քրեական հետապնդումը չդադարեցնելու վերաբերյալ առաջին ատյանի դատարանի որոշման դեմ պաշտպան Հովհաննես Խուդոյանի կողմից բերված բողոքի քննությունը:

Քիչ առաջ ՀՀ երկրորդ նախագահ Ռոբերտ Քոչարյանի պաշտպանական խումբը տեղեկացրեց, որ դատարանը հեռացել է խորհրդակցական սենյակ՝ մեղադրանքի կողմի ներկայացրած ինքնաբացարկ հայտնելու միջնորդության վերաբերյալ որոշում կայացնելու:

Փաստաբանական խումբը հայտնում է նաև, որ ՀՀ երկրորդ նախագահ Ռոբերտ Քոչարյանին անձեռնմխելիության հիմքով քրեական հետապնդումը չդադարեցնելու վերաբերյալ առաջին ատյանի դատարանի որոշման դեմ ներկայացված բողոքի գործով որոշումը կհրապարակվի այսօր:

Հիշեցնենք, որ մեղադրանքի կողմը միջնորդություն է ներկայացրել նախագահող դատավոր Վազգեն Ռշտունուն ինքնահացարկ հայտնելու վերաբերյալ՝ հիմքում դնելով այն հանգամանքը, որ Վազգեն Ռշտունին դեռևս նախորդ տարի լրատվամիջոցներից մեկին հարզացրույց է տվել նշելով, որ համաձայն է նույն դատարանի դատավոր Ալեքսանդր Ազարյանի կայացված որոշման հետ: