Քոչարյանի կենսաթոշակի վրա դրված արգելանքը հանվել է. ՄԻՊ

Մարդու իրավունքների պաշտպան Արման Թաթյանը թեև ձեռնպահ է մնում ՀՀ երկրորդ նախագահ Ռոբերտ Քոչարյանի ընթացիկ գործով գնահատականներ տալուց, խորհրդարանում լրագրողների հետ զրույցում, այդուհանդերձ, ասաց, որ այս հարցում հանրային վստահության բաղադրիչի ակնհայտ կարիք կա:

«Այս գործով պետությունը շատ ավելի մեծ բեռ է ստանձնում՝ ապահովելով իրավունքի գերակայությունը:  Կարևորել եմ նաև հանրային հաշվետվողականության բարձր աստիճանը, որ հանրային  վստահության բաղադրիչի հարցն իրացվի: Մեր համատեղ աշխատանքի շնորհիվ մի քանի հարցեր են լուծում ստացել, մասնավորապես` էլեկտրոնային միջոցի հետ կապված հարցը, ընտանիքի հետ տեսակցության հարցը։ Կենսաթոշակի վրա արգելանք էր դրված, մեր միջամտությամբ հանվել է»,- Քոչարյանի պահման մասին որոշակի մանրամասներ ներկայացրեց նա` ավելացնելով, որ ՔԿՀ-ների  ծառայողների վերաբերմունքից դժգոհություններ երկրորդ նախագահն իրեն չի ներկայացրել:

Թաթոյանը նշեց նաև, որ Ռոբերտ Քոչարյանը սովորական խցում է՝ առանձնահատուկ պայմաններ չունեցող:

Հարցին` անմեղության կանխավարկածի խախտում եղե՞լ է Քոչարյանի մասով, թե՞ ոչ, ՄԻՊ-ն արձագանքեց` այդ մասին  դեռ նախորդ հունիս ամսին ինքը հայտարարություն է արել` անմեղության  կանխավարկածի հետ կապված խնդիրներ են եղել։

 «Ես նշել էի, որ պաշտոնատար անձինք, հատկապես` հանցավորության դեմ պայքարի ոլորտի  պատասխանատու պաշտոնատար անձինք, պետք է զգույշ լինեն իրենց հայտարարություններում, որովհետև դա կարող է վնասել նաև այդ գործին, որն իրականացվում է։ Հիմա  ուզում եմ կրկին այս հարցը բարձրացնել և խնդրել բոլորին, որ հետևեն անմեղության կանխավարկածի սկզբունքին, դա կարևոր  նշանակություն ունի,  հատկապես` նաև պետության կողմից առաջ քաշված խնդիրները լուծելու համար»,- ամփոփեց նա: