Չեխիան և Հայաստանը միջազգային ու տարածաշրջանային անվտանգության հարցերում ընդհանուր մոտեցումներ ունեն. Դավիթ Տոնոյան

Չեխիայի պաշտպանության նախարար Լյուբոմիր Մետնարի` Հայաստան այցի շրջանակում համաձայնագիր է ստորագրվել ռազմատեխնիկական համագործակցության մասին:

Հայաստանի պաշտպանության նախարար Դավիթ Տոնոյանը չեխ գործընկերոջ հետ հանդիպումից հետո տեղի ունեցած համատեղ ճեպազրույցում նշեց, որ պաշտպանության ոլորտում հայ-չեխական երկկողմ համագործակցությունը սկսվել է 2010 թվականից, երբ ստորագրվել է ռազմական համագործակցության մասին համաձայնագիրը, որը հիմնված է բարձր մակարդակի քաղաքական հարաբերությունների, բարեկամության, փոխադարձ հարգանքի, ընդհանուր արժեքների վրա:

«Քիչ առաջ ստորագրված համաձայնագրով սահմանվում են համագործակցության` փոխադարձ հետաքրքրություն ներկայացնող ոլորտները, ձևաչափը և ընթացակարգերը: Այս երկար սպասված համաձայնագրից հետո համագործակցության համար ստեղծվում են նոր հեռանկարներ ռազմատեխնիկական և ռազմարդյունաբերության ոլորտներում»,- նշեց նախարարը:

Դավիթ Տոնոյանը տեղեկացրեց, որ Չեխիայի պաշտպանության նախարարի հետ առանձնազրույցի ընթացքում քննարկել են նաև տարածաշրջանային և միջազգային անվտանգությանն առնչվող հարցեր:

«Փաստեցինք  երկու բարեկամ երկրների միջև առկա բարձր մակարդակի հարաբերությունները և վերահաստատեցինք միջազգային ու տարածաշրջանային անվտանգության հետ կապված հարցերի շուրջ ընդհանուր մոտեցումները»,-ամփոփեց ՀՀ պաշտպանության նախարարը: