Բրիտանական ընկերությունը կուսումնասիրի Հայաստանում կուտակված աղբի կառուցվածքն ու քանակը, որ հետո ունենանք փակ աղբավայրեր

Տարածքային կառավարման և զարգացման նախարար Սուրեն Պապիկյանը մարտի 23-ի համապետական շաբաթօրյակին ակնկալում է  125-150 հազար քաղաքացու մասնակցություն:

«Այս շաբաթօրյակի նպատակն է մաքրել Հայաստանը աղբից, իսկ դա անել  մեկ օրում մեկ շաբաթօրյակի միջոցով հնարավոր չէ, ուստի այս պրոցեսը լինելու է շարունակական՝ ամեն ամիս ունենալու ենք համապետական մաքրության օր»,- լրագրողներին ասաց նա:

Ըստ նախարարի՝ այդ օրը կաշխատի 1700 միավոր տեխնիկա, կփակվի 6 աղբանոց և շուրջ 447 աղբակույտ:

«Հայաստանում կա 339 աղբանոց, որոնցից ոչ մեկը չի համապատասխանում միջազգային ստանդարտներին: Սրանք լոկալ աղբանոցներ են, հաճախ փորված համայնքապետի հայեցողությամբ, երբեմն ծածկվում են, երբեմն՝ ոչ: Իհարկե, մեր համայնքներում կան նաև սովորույթով հաստատված աղբանոցներ, որոնք մոտակա ձորակներն են և բոլոր հնարավոր տեղերը, որոնք աչքից հեռու են, և կարելի է թաքցնել աղբը: Մենք այս ամենը պետք է բերենք ստանդարտացման, ունենանք փակ աղբավայրեր, որը երկար պրոցես է, քանի որ չենք տիրապետում մեր աղբի մորֆոլոգիական կառուցվածքին և քանակին, ուստի կառավարությունն ուսումնասիրություն է սկսել, որը կատարելու է բրիտանական մի ընկերություն: Այս ընկերությունը կիրականացնի թե' աղբի մորֆոլոգիական  կառուցվածքի, թե' քանակի ուսումնասիրություն, թե' տարեկան Հայաստանում ինչքան աղբ է կուտակվում: Սրանից ելնելով` մենք կարող ենք աղբահանության ոլորտում ներդրումներ կատարելու ցանկություն ունեցող գործընկերներին ներկայացնել իրական պատկերը»,- մանրամասնեց Պապիկյանը: