Էրդողանն ու փեսան Անկարայում հանդիպել են Թրամփի փեսայի հետ

Թուրքիայի նախագահ Ռեջեփ Թայիփ Էրդողանը Անկարայում հանդիպել է ԱՄՆ նախագահ Դոնալդ Թրամփի խորհրդական Ջարեդ Քուշների հետ: Ըստ Սպիտակ տան տարածած հաղորդագրության` Թրամփի փորձառու խորհրդական ու օգնական Քուշների և Էրդողանի հանդիպմանը մասնակցել են նաև ԱՄՆ միջազգային հարաբերությունների հատուկ ներկայացուցիչ Ջեյսոն Գրինբլաթը և ԱՄՆ-ի` Իրանի հարցերով հատուկ ներկայացուցիչ Բրայան Հուքը. հայտնում է «Անադոլու» գործակալությունը:

Հանդիպման ընթացքում քննարկվել է երկու երկրների հարաբերությունների խորացման խնդիրը, ինպես նաև կարևորվել են Պաղեստինի և Իսրայելի հակամարտության կարգավորման մեջ Անկարայի և Վաշինգտոնի գործադրած ջանքերը: Հայտարարության մեջ, բացի այդ, նշվում է, որ տարածաշրջանային պայմանները բարելավելու համար անհրաժեշտ են ներդրումներ:

Քուշները նաև հանդիպել է Թուրքիայի ֆինանսների նախարար` Էրդողանի փեսա Բերաթ Ալբայրաքի հետ, քննարկել են համատեղ տնտեսական ծրագրեր իրականացնելու հարցը: