Ես հրաժարական չեմ տալու. ԵՊՀ ռեկտոր Արամ Սիմոնյան

Համալսարանը երբևէ այսպիսի ֆինանսական կայունություն չի ունեցել, ինչպես հիմա. լրագրողների հետ զրույցում ասաց ԵՊՀ ռեկտոր Արամ Սիմոնյանը:

«Մենք կուտակում էինք գումարները բանկերում, որ կարողանայինք պահել համալսարանի ֆինանսական կայունությունն արդեն 6 տարի: Մենք գուշակել էինք, որ արտագաղթի և այլ պատճառներով հնարավոր է, որ լինեն ֆինանսական խնդիրներ: Տարեվերջին դեֆիցիտային 750 միլիոն դրամ ունեինք, իսկ հիմա 80 միլիոն ունենք: Սա՞ է վատ կառավարումը»,- ասաց նա:

Սիմոնյանը հավելեց, որ ինքը նստած է ռեկտորի աթոռին արդեն 13 տարի: «Սա շատ ծանր, հոգնատանջ, բայց հաճելի աշխատանք է ինձ համար»,- ընդգծեց նա:

Ինչ վերաբերում է իր` հրաժարական տալուն, Սիմոնյանը վստահեցրեց. «Ես հրաժարական չեմ տալու: Եթե հոգաբարձուների խորհուրդը որոշի, ապա ես կենթարկվեմ այդ որոշմանը: Այո’, սա քաղաքական հետապնդում է, ինձ ուղղակի չեն ուզում տեսնել այս պաշտոնում, որում ես ընտրված եմ»:

Անդրադառնալով իր հասցեին հնչող մեկնաբանություններին` Արամ Սիմոնյանը նշեց. «Սատկած շանը փայտով չեն խփում: Հիմա որ իմ նկատմամբ այս հալածանքներն անում են… Եթե ես լինեի խեղճ ու կրակ, եթե ես լինեի ոչ պրոֆեսիոնալ, ինձ դուրս հանելը 1 րոպեի գործ կլիներ»: