Դիարբեքիրի Սբ Կիրակոս հայկական եկեղեցին կվերանորոգվի

Դիարբեքիրի պատմական Սուր թաղամասում Թուրքիայի զինված ուժերի և Քրդական բանվորական կուսակցության  միջև բախումների հետևանքով 4 տարի առաջ ավերված և համայնքային վաքըֆներին (ֆոնդերին) պատկանող հայկական Սուրբ Կիրակոս ու ասորական Մար Պետյուն քաղդեական եկեղեցիները կվերանորոգվեն շրջակայքի և քաղաքաշինության նախարարության կողմից:

Ըստ «Անադոլու» լրատվական գործակալության` Սուրը, պատմության ընթացքում լինելով տարբեր կրոնների, լեզվի, մշակույթի տեր մարդկանց և էզանի ու ղողանջի ձայների միախառնման վայր, ահաբեկչական հարձակումների հետևանքով մեծ վնաս է կրել, և արդեն սկսվել են աղոթավայրերի վերանորոգմանն ուղղված աշխատանքները:

Մինչ այդ վերանորոգվել էին Ֆաթիհ Փաշա, Շեյխ Մութահհար մզկիթները և հայկական բողոքական եկեղեցին, որոնք պատկանում էին Վաքըֆների գլխավոր միությանը: Իսկ հայկական Սուրբ Կիրակոսն ու քաղդեական Մար Պետյուն եկեղեցիները համայնքային վաքըֆների սեփականությունն են:

Գործակալությանը տված հարցազրույցում Սուրի գավառապետ Աբդուլլահ Չիֆթչին նշել է, որ աշխատանքները ծրագրում են սկսել մյուս ամիս: Վերանորոգումը կհովանավորի Թուրքիայի շրջակայքի և քաղաքաշինության նախարարությունը, կծախսվի մոտ 10 մլն թուրքական լիրա: