Դատարանը մերժեց 10 հազար դրամի գողության մեջ մեղադրվող Հասմիկ Սարգսյանի բողոքը

Երևան քաղաքի ընդհանուր իրավասության դատարանը, դատավոր  Դավիթ Բալայանի նախագահությամբ, այսօր հրապարակեց որոշում, որով մերժեց գողության մեջ մեղադրվող` երեք անչափահաս երեխաների մայր Հասմիկ Սարգսյանի բողոքը:

Դատարանում Սարգսյանի պաշտպանները վիճարկում են նրա նկատմամբ ենթադրյալ ապօրինի գործողությունների վերաբերյալ հարուցված քրեական գործի շրջանակներում նրա մատնանշած անձանց նկատմամբ քրեական հետապնդում չիրականացնելու, քրեական գործի վարույթը կարճելու որոշումը:

Սարգսյանը մեղավոր է ճանաչվել և դատապարտվել 10 000 դրամի գողության համար: Նա պնդում է, որ ոչ թե 10, այլ 4000 դրամ է գողացել: Ըստ Սարգսյանի՝  ինքը ոստիկանության Սիսիանի բաժնում 10 000 դրամի գողության վերաբերյալ ցուցմունք է տվել իր նկատմամբ հնչեցված սպառնալիքների  պատճառով:

Այս հանգամանքի ապացուցման պարագայում, որ Սարգսյանը սպառնալիքների ներքո է ցուցմունքներ տվել, դա կարևոր նշանակություն կունենա նաև նրան վերագրվող 10000 դրամի գողության գործի համար: