Խորհրդարանում իրենց ընդդիմություն հայտարարած ուժերը քաղաքական իմիտացիայի խնդիր են լուծում. Աղասի Ենոքյան

Մենք չունենք ընդդիմություն, ընդդիմությունը վերացավ, հիմա խորհրդարանում ունենք երկու քաղաքական ուժեր, որոնք իրենց հայտարարել են ընդդիմություն, բայց իշխանությանն ընդդիմանալու փոխարեն իրար դեմ են դուրս եկել: Այս մասին լրագրողների հետ հանդիպման ժամանակ ասաց «Մեդիա պաշտպան» ծրագրի ղեկավար Աղասի Ենոքյանը:

«Իրար ընդդիմանալով` քաղաքական իմիտացիայի խնդիր են լուծում, թե խորհրդարանում քաղաքական պայքար է գնում, բայց դա չի կարող որևէ արդյունք տալ, քանի որ ընդդիմությունն ընդդիմության դեմ է պայքարում: Այսինքն՝ քաղաքական քայլեր անելու համար ընդդիմություն չունենք, չունենք մեծաթիվ զանգվածներ, որոնք դուրս կգան և քաղաքական որոշումներ կպարտադրեն, շատ-շատ` կրիմինալների կազմակերպած` փողոց փակելը պիտի լինի, որոնք ստիպում են Մանվելին կրկին հետ տանել բանտ: Ամենակարևոր գործիքն այսօր, որ կա, երբ ինչ-որ առումով հնարավոր է իշխանությանը պահել հաշվետվողության կամ վերահսկողության տակ, մամուլն է, ուստի պատահական չէ, որ իշխանությունները մամուլի դեմ քայլեր են անում»,- ընդգծեց Ենոքյանը՝ շեշտելով, որ մամուլի գործը հարձակվելն է, ինչը եղել է և' Քոչարյանի ժամանակ, և' Սերժ Սարգսյանի:

«Մամուլը պարտավոր է իրեն այդպես պահել, ուստի իշխանությունների կողմից պատերազմ հայտարարելն անհեթեթություն է»,- ասաց Ենոքյանը: