Ոստիկանապետի պաշտոնանկության մասին շրջանառվող լուրերում հղում է արվում հորինված տեղեկությունների. ոստիկանության պարզաբանումը

ՀՀ ոստիկանությունն արձագանքել է մամուլում Վալերի Օսիպյանի պաշտոնանկության մասին լուրերին` տարածելով պարզաբանում:

«Որոշ լրատվամիջոցներ կրկին Հայաստանի ոստիկանության պետի պաշտոնանկության մասին լուրեր են շրջանառում՝ հղում անելով անփաստարկ ու ինքնահնար տեղեկությունների: Նպատակը պարզ է՝ բարձրագոչ հայտարարություններով ընթերցող գայթակղել, իսկ նպատակին հասնելու համար օգտագործվում են ճղճիմ ու ցածրակարգ միջոցներ, որոնք հակասում են քաղաքացու իրազեկված լինելու իրավունքին ու լրատվության ճշմարիտ առաքելությանը:

Կրկին կոչ ենք անում լրատվամիջոցներին՝ ձեռնպահ մնալ ասեկոսեներով հանրությանը ապակողմնորոշելու գործելակերպից, մեկընդմիշտ հասկանալ, որ պաշտոնատար անձին հորինած «տեղեկատվությամբ» թիրախավորելով՝ հարվածում եք գերատեսչությանն ու պետականությանը, նաև վտանգում ձեր՝ լրատվամիջոցի հեղինակությունը, քանի որ սուտը միշտ բացահայտվում է և կարող է արժեզրկել ձեր ողջ աշխատանքը»,- ասվում է պարզաբանման տեքստում: