Այն գործողությունները, որոնք արվում են ճանապարհները փակելու հետ կապված, արվում են ուղիղ ընդդեմ կառավարության. Փաշինյան

Այսօր «Ֆեյսբուք» սոցիալական ցանցում ուղիղ եթերի միջոցով վարչապետ Նիկոլ Փաշինյանն անդրադարձել է Մանվել Գրիգորյանի խափանման միջոցը փոխելու հետ կապված` Էջմիածնում տեղի ունեցող իրադարձություններին:

Նա ճիշտ չի համարում այն դիտարկումները, թե հիմա ճանապարհ են փակում, որովհետև հեղափոխության օրերին էլ են ճանապարհներ փակվել:

«Ասում են՝ բա լա՞վ է, որ դուք փակում էիք: Հարգելի' քաղաքացիներ, մենք փակում էինք, որովհետև երկրում չկար ժողովրդի վստահությունը վայելող իշխանությունը: Այսօր մեր քաղաքացիներն իրենց իշխանությունը ձևավորել են ազատ, արդար ընտրություններով: Եվ այդ իշխանությունը պետք է առկա խնդիրները լուծի: Մարդիկ ասում են՝ Մանվել Գրիգորյանին բաց են թողել: Այնպիսի տպավորություն է, որ իրենք են Մանվել Գրիգորյանին բռնել, մենք էլ բաց ենք թողել: Մեր իշխանության, կառավարության գործունեության արդյունքում են տեղի ունեցել այդ բացահայտումները: Հիմա այն գործողությունները, որոնք արվում են ճանապարհները փակելու հետ կապված, արվում են ուղիղ ընդդեմ կառավարության: Կրկին հուսահատ շեշտադրումներ են ի հայտ գալիս, թե` տեսեք, կառավարությունը չի կարող ճանապարհները բաց պահել, ոչինչ չի փոխվում և այլն»,- ասել է Նիկոլ Փաշինյանը:

ՀՀ վարչապետն ընդգծել է, որ Մանվել Գրիգորյանին ուղղված մեղադրանքները չեն վերացվել: Նա վստահեցրել է, որ Մանվել Գրիգորյանի գործի նախաքննությունը հասնելու է դատական գործընթացին, միաժամանակ ընդգծել, որ եթե վերնոշյալ գործի խափանման միջոցը փոխվել է, ապա դա դեռ չի նշանակում, որ նրան ուղղված մեղադրանքները վերացվել են:

«Անկեղծ, ինձ համար էլ տհաճ էր, որ իմացա խափանման միջոցը փոխելու մասին: Բայց հենց դա է խնդիրը` անկախ դատական իշխանություն գոյություն չի ունենում այն ժամանակ, երբ իշխանությունը փորձում է դատական համակարգից իր համար միայն հաճելի լուրեր լսել: Մյուս կողմից` ես գտնում եմ, որ պատասխանատվության անխուսափելիությունը շատ կարևոր սկզբունք է, և որևէ մեկը չի կարող խուսափել պատասխանատվությունից: Էջմիածնում մի քանի կլաններ են եղել, միշտ իրար դեմ պայքարել են: Իմ տպավորությամբ` ոմանք փորձում են մանիպուլյացիաներ անել և այս ֆոնի տակ կլանային հարաբերություններ հաստատել Էջմիածնում: Դա չի անցնելու: Որոշ` նախկին կլանային ուժեր փորձում են իրավիճակից օգտվել: Ժողովուրդն իր իշխանությանը ընտրել է, և այդ իշխանության լիազորությունն է ապահովել ճանապարհների անցանելիությունը: Եթե ուզում են իրավիճակը կաթվածահար անել, ուրեմն գործում են ուղիղ կառավարության դեմ»:

«Ես ուզում եմ խնդրել, որ փաստաբաններին չընկալեք հանրության թշնամի: Մենք վենդետա չենք ուզում, մենք ուզում ենք արդարադատություն, իսկ դրա ամենակարևոր նախապայմանը անկախ համակարգն է, ինչպես նաև մեղադրյալի պաշտպանության իրավունքը, որ պետք է իրականացվի պաշտպանի միջոցով: Ես վստահեցնում եմ՝ Հայաստանում ոչ մի կոռուպցիոներ չի խուսափելու պատասխանատվությունից»,- ասել է Նիկոլ Փաշինյանը: