Մոտ ապագայում կգործարկվի Իրանի հետ առևտրի հատուկ ֆինանսական մեխանիզմը. Մոգերինի

Առաջիկա շաբաթների ընթացքում կգործարկվի Իրանի հետ առեւտրի հատուկ ֆինանսական մեխանիզմը: Այս մասին, ըստ aliqonline.ir-ի, երեկ  Բրյուսելում ԵՄ ԱԳ նախարարների նիստի ավարտին տեղեկացրել է կառույցի արտաքին քաղաքականության եւ անվտանգության հարցերով գերագույն հանձնակատար, Եվրոպական հանձնաժողովի փոխնախագահ Ֆեդերիկա Մոգերինին։

ԵՄ արտաքին քաղաքականության ղեկավարն ասել է, որ դեռեւս չի կարող ներկայացնել մեխանիզմի մանրամասները` միեւնույն ժամանակ նշելով, որ ԵՄ անդամ երկրների ԱԳ նախարարները համակարծիք են Իրանի հետ Միջուկային համապարփակ համաձայնագիրը պահպանելու հարցում:

«Մենք պարտավորություն ենք ստանձնել, որպեսզի իրանցիներն օգտվեն պատժամիջոցների չեղարկման առավելություններից, անգամ այն բանից հետո, երբ ԱՄՆ-ն կրկին վերկանգնել է Իրանի դեմ սահմանված պատժամիջոցները»: