Իրանի նախագահը մոտ ապագայում կարող է գալ Հայաստան. իրանագետ

Իրանի դեմ պատժամիջոցների վերացումից հետո նկատելի դարձավ, որ Հայաստան-Իրան հարաբերությունների տնտեսական մասում նկատելի առաջընթաց կա. այսօր լրագրողներին ասաց իրանագետ Վարդան Ոսկանյանը:

Նա կարծիք հայտնեց, որ Իրանի նախագահ Հասան Ռոհանիի՝ Հայաստան այցը կարող է տեղի ունենալ շատ մոտ ապագայում: Ըստ իրանագետի՝ հաշվի առնելով իրանակական լրատվամիջոցներում տեղ գտած հրապարակումների քանակն ու ինտենսիվությունը, կարելի է կանխատեսել, որ Ռոհանին Հայաստանում կլինի ոչ ուշ, քան դեկտեմբերի երկրորդ կեսին: Ոսկանյանն ընդգծեց, որ Հայաստանի և Իրանի համագործակցության շրջանակը հատկապես ամրացել է էներգետիկ և գազի ոլորտներում:

«Հայաստանը ստեղծել է կազմակերպություն, որ պետք է զբաղվի դեպի երրորդ երկիր՝ Վրաստան, գազ արտահանմամբ: Հնարավորություն է ստեղծվում, որ իրանական գազն արտահանվի Վրաստան»,- ասաց Ոսկանյանը՝ հավելելով, որ այս համատեքստում Ռուսաստանի՝ թույլատրելու-չթույատրելու խնդիրն ուռճացված է, և ՌԴ-ն հասկացել է՝ մասնակցային տարբերակն ավելի ընդունելի է: Իրանագետը շեշտեց նաև, որ Հայաստանով դեպի Վրաստան իրանական գազի արտահանումը մեր երկրի համար տնտեսապես շահավետ կլինի, և Հայաստանի աշխարհաքաղաքական դերը կբարձրանա:

Ոսկանյանի խոսքով՝ Հայաստան-Իրան հարաբերություններում կարևորագույն քայլ է վիզային ռեժիմի չեղարկումը: «Հայաստանն ու Իրանը հասել են այնպիսի հարաբերությունների, որ միմյանց երկիր այցելելու համար մուտքի արտոնագիր հարկավոր չէ»,- ասաց իրանագետը՝ ընդգծելով, որ այստեղ առկա է նաև հոգեբանական գործոն, և վիզային ռեժիմի չեղարկումը նպաստել է իրանցի զբոսաշրջիկների` Հայաստան այցի աճի վրա:

Ոսկանյանի կարծիքով` լավ կլիներ, որ Հյուսիս-հարավ ավտոճանապարհի շինարարությունը հնարավորինս արագացվեր:

Իրանագետը նշեց նաև, որ կարևոր է երկու երկրների մշակութային հարաբերություններ սերտացումը: «Մշակութային հարաբերությունների սերտացմանը մենք պետք է լրջագույն ուշադրություն դարձնենք»,- ասաց նա՝ հավելելով. «Մեր որոշ հարևաններ անհանգստացած են հայ-իրանական հարաբերությունների խորացմամբ: Յուրաքանչյուր հայամետ իրանցի մեզ համար շատ կարևոր է»: