Նախարարներն իրենք են խնդրում, որ առաջինն իրենց նախարարություններից սկսենք ստուգումները. Դավիթ Սանասարյան

Այսօր` կառավարության նիստից հետո, պետական վերահսկողական ծառայության ղեկավար Դավիթ Սանասարյանն անդրադարձավ ստուգումների ընթացքին: Նա հայտարարել էր, որ առաջինը սկսելու են ՊՆ-ից:

Սանասարյանի խոսքով` ստուգումների պրոցեսում որևէ դեր չի կարող խաղալ այն, թե այս կամ այն նախարարն իրենց ընկերն է, թե` ոչ: «Աննախադեպ բան եմ ասում, բայց նախարարներն իրենք են խնդրում, որ առաջինն իրենց նախարարություններից սկսենք ստուգումները»,- ասաց նա:

Ըստ Սանասարյանի` տարբեր պետական մարմիններ տարբեր ժամանակահատվածներում շարունակ մսխել են պետական միջոցները, հիմա պետք է դրա վերջը տան:

Ինչ վերաբերում է հարցին, թե արդյո՞ք հանձնել է իր ունեցվածքի մասին հայտարարագիրը, նա պատասխանեց. «Ներկայացնելու եմ իմ հայտարարագիրը, որի բոլոր տողերում զրո է: Չունեմ սեփականություն, վերջին ամիսներին գործ չեմ ունեցել: Այսուհետ էլ ապրելու եմ աշխատավարձով»: