Սյունիքում շարունակում է իշխել Սուրիկ Խաչատրյանի ազդեցությունը. Դավիթ Սանասարյան

Սյունիքում դեռ չի վերացել վախի մթնոլորտը: Սյունիքի թիվ 38 ընտրատարածքում հաղթած պատգամավորը Սուրիկ Խաչատրյանի թեկնածուն է: Նա այն մարդն է, ում կապանցիները չեն սիրում: Դա նշանակում է, որ Սուրեն Խաչատրյանի ազդեցությունը շարունակելու է մնալ Սյունիքում: Անդրադառնալով սեպտեմբերի 29-ին կայացած ընտրություններին` ասաց «Բարեւ Երեւան» դաշինքի եւ Երեւանի ավագանու անդամ Դավիթ Սանասարյանը:

Ըստ նրա` Հայաստանում դեռ չի ձևավորվել ընտրական մշակույթը, և Սյունիքի ընտրությունները ևս բացառություն չեն:

Նույն կարծիքին չէ, սակայն, ՀՀԿ-ական Սուքիաս Ավետիսյանը: Նրա խոսքով` չի կարելի ասել, որ ընտրությունները, որտեղ 85% ձայն է հավաքել ՀՀԿ-ական թեկնածուն, կեղծվել են:

«Ժառանգությունը» պետք է իր պարտությունը փնտրի քաղաքական ուժի կամ իր թեկնածուի մեջ»,- ասաց նա և հավելեց, որ իրենց մնում է միայն շնորհավորել նորընտիր պատգամավորին:

Նշենք, որ, ըստ ԿԸՀ նախնական տվյալների, թիվ 38 ընտրատարածքի 50370 ընտրողներից ընտրությանը մասնակցել է 25349-ը, որոնցից 20744-ն իրենց ձայնը տվել են մարզպետի խորհրդական, ՀՀԿ-անդամ Արմեն Կարապետյանին: