Թե երբ կնշանակվեն արտահերթ ընտրությունները, բացառապես քաղաքական ուժերի որոշման խնդիրն է. Տիգրան Մուկուչյան

Ձեռնպահ կմնամ առաջիկա ընտրությունների անցկացման որևէ ժամկետ հնչեցնելուց. խորհրդարանում լրագրողներին ասաց ԿԸՀ նախագահ Տիգրան Մուկուչյանը:

«Թե երբ կնշանակվեն արտահերթ ընտրությունները, բացառապես քաղաքական ուժերի որոշման խնդիրն է, ԿԸՀ-ն Ընտրական օրենսգրքի բարեփոխումներին չի մասնակցում»,- ասաց նա:

Հարցին՝ հնարավո՞ր է, որ ընտրություններն այս տարվա աշնանն անցկացվեն, Մուկուչյանը պատասխանեց. «Ես կդժվարանամ պատասխանել։ Մենք տեղեկացված ենք, որ ակտիվ աշխատանքներ են տարվում Ընտրական օրենսգրքի բարեփոխումների հետ կապված։ Պետք է տեսնել, թե ինչ ծավալների դրանք կլինեն»։

Մուկուչյանի խոսքով ` այդ բարեփոխումներից հետո համապատասխան ընթացակարգերով ընտրություններ կանցկացվեն:

Անդրադառնալով ռեյտինգային ընտրակարգի շուրջ հնչող քննադատություններին` նա ասաց, որ դրանք նորություն չեն և կիրառվում են շատ երկրներում։

Հարցին՝ ինչպե՞ս է հնարավոր, որ երկրում լեգիտիմ ընտրություններից մեկ տարի հետո հեղափոխություն է տեղի ունենում, ԿԸՀ նախագահն արձագանքեց. «Հարցի վերաբերյալ ցանկացած պատասխան հնչեցնելը քաղաքական գնահատական կպարունակի։ Ես ընդամենը կարող եմ ասել, որ ընտրությունների մասին գնահատականները ամրագրված են նաև միջազգային դիտորդական առաքելությունների կարծիքներում»։