Ազգային ժողովն այն վայրը չէ, որտեղ անեկդոտներ են պատմում. Տիգրան Մուկուչյան

Երեկ ԱԺ-ում ՀԱԿ խմբակցության պատգամավոր Նիկոլ Փաշինյանը ՀՀ կենտրոնական ընտրական հանձանաժողովի հաղորդագրության քննարկման ժամանակ անեկդոտ էր պատմել, որում անուղղակիորեն շոշափել էր ԿԸՀ նախագահ Տիգրան Մուկուչյանի անունը:

Վերջինս Փաշինյանի կատակին պատասխանել էր լրջորեն` նշելով, որ հարցն այն չէ, որ իր հասցեին է վատ բաներ ասում, այլ այն, որ ժողովուրդը նրանից ամեն ինչ շատ վատ փաթեթավորմամբ է ստանում:

Ցանկանալով բնորոշել Փաշինյանի կերպարը` Մուկուչյանը մեջբերել էր Թումանյանի քառյակներից մեկում հիշատակված խոսքերը. «Դեռ հեռու է մինչեւ մարդը իր ճամփան»:

Այսօր yerkir.am-ի լրագրողը ԿԸՀ նախագահից հետաքրքրվեց` արդյո՞ք իր պատասխանը կոպիտ չէր, չէ՞ որ, վերջին հաշվով, Փաշինյանի պատմածն ընդամենը անեկդոտ էր:

«Մարդը անունս տալիս է, սակայն ասում է սա Ձեր մասին չէ, ինչպե՞ս սա հասկանանք: Դա արդեն գիտության այլ ոլորտից է, երևի մարդ դրա մեջ պետք է խորանա, որ փորձի ինչ-որ բան գտնել»,- ասաց նա:

Մուկուչյանի խոսքով` Փաշինյանին ուղղված պատասխանը համարժեք էր: «Ես գիտակցում եմ, որ Ազգային ժողովն այն վայրը չէ, որտեղ անեկդոտներ են պատմում»,- հավելեց նա: