Թիվ 16 պոլիկլինիկայում տնօրենի ԺՊ-ն նշանակվել է Տարոն Մարգարյանի ցանկությամբ և օրենքի խախտմամբ

Այսօր Երևանի ավագանու հերթական նիստն է: Օրակարգում ընդգրկված է 5 հարց:

«Ելք» խմբակցությունից Հերմինե Վարդանյանը նիստի սկզբում նշեց, որ այսօր առավոտյան եղել են թիվ 16 պոլիկլինիկայում, որտեղ արդեն 2-րդ օրն է, ինչ գործադուլ և բողոքի ակցիա են իրականացնում աշխատակիցները: Վարդանյանը նշեց, որ նրանք քաղաքապետին ուղղված նամակ ունեն, որն իրեն են փոխանցել:

«Փոխքաղաքապետ Դավիթ Օհանյանը օրերս Նունե Խաչատրյանին ներկայացրեց մեզ, և նշանակումը կատարվել է՝ հաշվի չառնելով աշխատակիցների ցանկությունը: Բացի այդ՝ խախտվել է ԺՊ նշանակելու ընթացակարգը. չի նշանակվել գործող փոխտնօրեններից և ոչ մեկը, ինչը նախատեսված է օրենքով: Քաղաքապետարանից նշանակված անձը չունի ղեկավարման փորձ, երբևէ չի վարել որևէ պաշտոն, ինչպես նաև չունի անհրաժեշտ ոլորտի վերապատրաստում»,- ասաց Վարդանյանը:

Նամակում նշված էր նաև, որ պոլիկլինիկայի տնօրենը անհարգալից վերաբերմունք է դրսևորում աշխատակիցների հանդեպ, իսկ հարցին, թե ինչպե՞ս է նա նշանակվել, հնչել է պատասխան, որ տնօրենն անձամբ քաղաքապետ Տարոն Մարգարյանի որոշմամբ և կողմից է նշանակվել:

Ի պատասխան Երևանի քաղաքապետ Տարոն Մարգարյանը նշեց, որ իրենք տիրապետում են իրավիճակին, և ուսումնասիրություններ են իրականացվում: