''Որոտան''-ի վաճառքը կառավարությունն իրականացրել է օրենքի կոպիտ խախտմամբ

Այսօր ԱԺ նիստում ՀԱԿ խմբակցության ղեկավար Լևոն Զուրաբյանը բարձրացրեց Որոտանի կասկադի վաճառքի հարցը: Նա նշեց, որ դա ապօրինի գործարք էր կառավարության կողմից:

«Գիտենք, որ կառավարությունը ինչ-որ գործարքներ է ստորագրել՝ շրջանցելով օրենքը: Խախտվել է մասնավորեցման մասին օրենքը, և ամերիկյան ֆիրմաներին վաճառվել է ամբողջ գույքը: Խախտվել է նաև ԱԺ օրենքը: Ի՞նչ եք պատրաստ անել, որպես ԱԺ նախագահ, որովհետև կառավարության նման կեցվածքը խախտում է ոչ միայն Սահմանադրությունը, այլ նաև ԱԺ օրենքը»,- ասաց նա:

ԱԺ նախագահ Հովիկ Աբրահամյանը նշեց, որ չի կիսում Լևոն Զուրաբյանի կարծիքը` այդ հարցի հետ կապված: «Խնդրում եմ` մասնավոր հարցերը չկապել ԱԺ իմիջի ու դերակատարության հետ: Եթե խոսքը գնում է մասնավորեցման օրենքի մասին և կառավարությունն իր լիազորությունները չարաշահել է, ուրեմն կանդրադառնանք այդ հարցին և իրավաբանների հետ կփորձենք խնդրի էությունը հասկանալ»,- ասաց Հովիկ Աբրահամյանը:

Yerkir.am-ի հետ զրույցում ՀԱԿ խմբակցության քարտուղար Արամ Մանուկյանը նշեց. «Հստակ է, որ այդ գործարքը օրենքի խախտումով է եղել: Տեղի է ունեցել օտարում՝ օրենքի կոպիտ խախտմամբ»: