Բուհերում կան առարկաներ, որոնք կարող են նաև դասավանդվել ավագ դպրոցում. Արայիկ Հարությունյան

Միջնակարգ դպրոցից անցումն ավագ դպրոցի, ցավոք, իր հիմնական նպատակին չի ծառայել. ԿԳ ենթակայության և մասնավոր ուսումնական հաստատությունների ղեկավարների հետ հանդիպման ժամանակ ասաց ՀՀ ԿԳ նախարար Արայիկ Հարությունյանը:

Նա նշեց, որ ավագ դպրոցների հետ կապված բազմաթիվ մտահոգություններ կան, թե արդյո՞ք ուսումնառության տարիները չեն կրճատվելու: Նախարարի խոսքով՝ 12-ամյա կրթությունը լավ համակարգ է, պարզապես դրա տակ պետք է լուրջ բովանդակություն դրվի:

«Բուհերում կան հիմնական առարկաներ, որոնք կարող են նաև դասավանդվել ավագ դպրոցում. դրանով ավագ դպրոցն ավելի հետաքրքիր կդառնա: Եթե նախկինում ասում էին՝ դրանք այն առարկաներն են, որոնք աշակերտը հասուն տարիքում պետք է անցնի, հիմա ավագ դպրոցում աշակերտները 16 տարեկանից են սովորում, ուստի այդ առարկաների ներդրման առումով որևէ խնդիր չպետք է լինի: Բուհերում տարբեր «օլիգարխ» ֆակուլտետներ գիտխորհուրդներին պարտադրում են իրենց դասընթացները, որպեսզի իրենց ծանրաբեռնվածությունն ապահովեն, և դրա հետևանքով տուժում են հիմնական մասնագիտությունները»,- ասաց նախարարը: