Դպրոցում նոր առարկաներ կուսուցանվեն

Ուսուցիչների վերապատրաստման, ուղեցույցների եւ մեթոդական ձեռնարկների մշակման, դպրոցական եւ զանգվածային միջոցառումների կազմակերպման վերաբերյալ համագործակացության հուշագիր է ստորագրվել կրթության եւ գիտության նախարարության եւ «Հայաստանի պատանեկան նվաճումներ» հասարակական կազմակերպության միջեւ:

ԿԳ նախարար Արմեն Աշոտյանը հատկապես կարեւորել է այն, որ համագործակցության շրջանակներում հանրակրթական ծրագրում ներառվելու են տնտեսագիտական եւ ձեռներեցության հմտությունների վերաբերյալ դասեր:

Այս առարկաները պարտադիր չեն դասավանդվելու, ներառվելու են լրացուցիչ կրթական ծրագրերում:

«Աշխարհում, որն այսօր ունի իր կանոնները, հաջողակ է համարվում նորարար եւ ստեղծագործ մարդը: Մենք` որպես կրթության լիազոր մարմին, կարեւորում ենք աշակերտների նախաձեռնողականությունը: Եվ  դպրոցներում երեխաներին ձեռներեցության մասին տարրական գիտելիքներ տալը ժամանակի պահանջ է:

Միայն պետության ջանքերը բավարար չեն լրացուցիչ կրթության այժմյան պահանջարկը բավարարելու համար: Փորձը ցույց է տալիս, որ առավել հաջողված են կրթական այն նախաձեռնությունները, որոնք իրականացվում են հասարակական կառույցների հետ համատեղ»,- ասել է Ա. Աշոտյանը: