«Ծառուկյան» դաշինքում բիզնես ունեցող պատգամավորները չեն հարուցում երկրային օրենքների զայրույթը. Գևորգ Պետրոսյան

ԱԺ «Ծառուկյան» դաշինք խմբակցության պատգամավոր Գևորգ Պետրոսյանը տեղեկություններ չունի` կա՞ն պայմանավորվածություններ ԲՀԿ-ին մարզպետերի պորտֆելներ տալու վերաբերյալ, թե՞ ոչ: ԱԺ-ում լրագրողները Գևորգ Պետրոսյանից հետաքրքրվեցին, թե, այնուամենայնիվ, ընթանո՞ւմ են բանակցություններ, թե՞ ոչ։ Ի պատասխան պատգամավորն ասաց, որ ինքն անձամբ չի մասնակցում նմանատիպ քննարկումների։

Գևորգյանն անդրադարձավ նաև ԱԱԾ նորանշանակ տնօրեն Արթուր Վանեցյանի հայտարարություններին: Նա նշեց, որ ողջունելի է, երբ պաշտոնատար անձինք հետամուտ են պետական բյուջեի միջոցները վերականգնելու ուղղությամբ աշխատանքներին:

Հարցին` «Ծառուկյան» դաշինքի գործարար մասում մտահոգություններ չկա՞ն, Գևորգյանը պատասխանեց. «Գործարար հասկացության մեջ թշնամի մի որոնեք, պետությունը հիմված է նաև գործարարների վրա: «Ծառուկյան» դաշինքում կան պատգամավորներ, ովքեր ունեն բիզնեսներ, բայց նրանք անձամբ չեն մասնակցում բիզնեսի կառավարմանը և չեն հարուցում երկրային օրենքների զայրույթը: Իսկ կոնկրետ կոռուպցիոներների մասին ես ձեզ ինֆորմացիա տալ չեմ կարող: Վստահ եմ, որ մեր խմբակցությունում այդպիսի մարդիկ չկան, և ԱԱԾ տնօրենի հայտարարությունը չի վնասում մեր խմբակցության պատգամավորներին: Այս պահին մեր խմբակցությունում չկա այնպիսի մարդ, որ իր պաշտոնը ծառայեցնի բիզնեսի զարգացմանը»: