Իմ ընտրվելու դեպքում հենց վաղվանից Հայաստանում չի լինի մենաշնորհ. Նիկոլ Փաշինյան

Ներհայաստանյան կյանքին վերաբերող ուժեղ ուղերձն արդարության պահանջն է, մեր կառավարությունը լիարժեքորեն կիրագործի այն. խորհրդարանում ելույթի ժամանակ հայտարարեց վարչապետի թեկնածու Նիկոլ Փաշինյանը:

«Մինչև այս հեղափոխությունը վախն ու խտրականությունն ուղեկցում էին բոլորին. կրթություն ստանալիս, աշխատանք փնտրելիս, ամենուր մարդիկ բախվում էին այս պրոբլեմների հետ: ՀՀ որևէ քաղաքացի այլևս չպետք է իրեն թույլ զգա մեջք չունենալու պատճառով: Սահմանադրությունը պետք է դառնա այն մեջքը, որը պատկանում է բոլորին»,- ասաց նա:

Փաշինյանն ասաց, որ բոլորը հավասար են լինելու օրենքի առաջ: «Սա առաջին հերթին վերաբերում է վարչապետի ընտանիքին: Ապօրինի հարստացումն իր հետ պետք է բերի հետևանքներ: Իմ ընտրվելու դեպքում հենց վաղվանից Հայաստանում չի լինի մենաշնորհ, որևէ մեկի առջև չի գործի որևէ ապրանք բերելու արգելք: Գերիշխող դիրքի չարաշահումները բացառվելու են»,- ընդգծեց նա:

Անդրադառնալով Սփյուռքին` վարչապետւ թեկնածուն հայտարարեց, որ Սփյուռքի հետ հարաբերությունների հիմքում չպետք է լինի միայն նրանց աջակցությունը, այլ Սփյուռքի մասնագիտական ներուժը պետք է բերվի և ծառայեցվի պետակաշինության գործին:

Փաշինյանն անդրադարձավ նաև վարկային բեռին: «Հարյուրհազարավոր քաղաքացիներ տառապում են վարկային բեռի տակ: Բազմաթիվ վարկային կազմակերպություններ մարդկանց ոչ միայն վարկեր են տվել, այլ դրան գումարվել է տխրահռչակ վերխերի ինստիտուտը: Քաղաքացին ստիպված է եղել 20 տոկոսը նվիրել նրանց` վարկ ստանալու համար: Պետք է շուտափույթ լուծել այս խնդիրները և լուծել այնպես, որ բանկերն ու վարկային կազմակերպություններն էլ չտուժեն»,- ասաց նա:

Փաշինյանի խոսքով` իշխանությունը քաղաքացուն մի գործառույթ էր վերապահում, որ քաղաքացին խախտում անի և տուգանվի` այսպես ապահովելով որոշ շրջանակների եկամուտները, բայց սրան պետք է վերջ տրվի: Նա նշեց, որ, որպես վարչապետի թեկնածու, կարող է վստահ հայտարարել` այս շարժումը գեներացրել է այնպիսի էներգետիկա, որ ոչ թե արտագաղթը կանգնեցվի, այլ մեծ հայրենադարձությանը նպաստի:

«Որևէ կասկած չունեմ, որ ժողովրդի թեկնածուի` վարչապետ ընտրվելու պարագայում ներգաղթ կսկսվի, ներդրումներ կլինեն: Սա ոչ միայն բարձրացնելու է Հայաստանի անվտանգությունը, այլև բերելու է Ղարաբաղի հարցի լուծում, մարդկային ռեսուրսի ճգնաժամի հաղթահարում տեղի կունենա, կբարձրանա բանակի մարտունակությունը: Ամենաամոթալի խարանը կջնջվի` 30% աղքատությունը: Հայաստանում մերժվածներ ու լքվածներ չպետք է լինեն: Ժողովրդական հեղափոխությունը խթան է տվել` մարդիկ Հայաստանում տեր են զգում»,- հայտարարեց Փաշինյանը: