Լարված ներքաղաքական վիճակը բացասաբար է անդրադառնում մեր տնտեսության վրա. ֆինանսների նախարար

Այսօր` կառավարության նիստից հետո, լրագրողների հարցերին պատասխանեց ֆինանսների նախարար Վարդան Արամյանը:

Հարցին, թե մտադի՞ր է աշխատել նոր ձևավորվող կառավարությունում, և արդյո՞ք տեղյակ է` Կարեն Կարապետյանը հրաժարակա՞ն է տվել, թե՞ շարունակելու է աշխատել, Վարդան Արամյանը պատասխանեց, որ ինքը այլոց վերաբերյալ քաղաքական հայտարարություններ անելու լիազորություններ չունի, և որ նման հայտարարություններ կարող են անել այլ պաշտոնյաներ:

Թե ինչպե՞ս կբացվեն խաղաքարտերը քաղաքական դաշտում, Արամյանը չի կարող ասել, սակայն առայժմ կառավարությունը աշխատում է բնականոն հունով:

Հարց հնչեց, թե ի՞նչ հարցի շուրջ են ընթանալու ոչ պաշտոնական բանակցությունները Մոսկվայում` փոխվարչապետի պաշտոնակատար Արմեն Գևորգյանի ու ԱԳ նախարար Էդվարդ Նալբանդյանի մասնակցությամբ: Վարդան Արամյանը պատասխանեց, որ այդ այցից ինքը տեղյակ չէ:

«Նախ ասեմ, որ պաշտոնապես հերքվեց տեղեկատվությունն այն մասին, թե Կարեն Կարապետյանը հրաժարական է տվել: Ստեղծված իրավիճակը մտահոգում է բոլորիս: Միջազգային փորձը ցույց է տալիս, որ երբ տեղի է ունենում որոշակի լավածություն ու անհանգստություն, դրանք ազդում են տնտեսական աճի, տնտեսական ցուցանիշների վրա»,- ասաց նախարարը:

Վարդան Արամյանը արձանագրում է, որ Սերժ Սարգսյանի հրաժարականի հայտարարությունից հետո եղել է եվրոպարտատոմսերի եկամտաբերության հետնահանջ: «Օր օրի, ինչքան երկարում է նման լարված իրավիճակը, դա վատ է անդրադառնում մեր տնտեսության վրա»,- ասաց նա: