Հաշմանդամության կարգի տրամադրման ընթացակարգը պարզ և կանխատեսելի չէ. վարչապետը հանձնարարական տվեց

Վարչապետ Կարեն Կարապետյանն այսօր կառավարության նիստում հանձնարարական ուղղեց բժշկասոցիալական փորձաքննության ոլորտի խնդիրների վերացման վերաբերյալ: 

Վարչապետի խոսքով` սոցիալական պաշտպանության ոլորտում մատուցվող ծառայությունների հասցեականության և արդարության ապահովման գործընթացում կարևոր դերակատարում ունեն բժշկական-սոցիալական փորձաքննություն կատարող հանձնաժողովները:

«Չնայած նախկին ձեռնարկած որոշ միջոցներին` ներկայումս գործող կարգավորումները, ինչպես նաև նշված հանձնաժողովների արդյունավետությունն անբավարար են: Մասնավորապես` հանձնաժողովների գործունեության մեջ նվազագույնի  հասցված չէ սուբյեկտիվ գործոնների ազդեցությունը, հաշմանդամության կարգի տրամադրման ընթացակարգը պարզ և կանխատեսելի չէ: Լիարժեք չէ հաշմանդամության ճանաչման գործընթացի կազմակերպման և մոնիտորինգային համակարգը»,- ասաց Կարապետյանը:

Վարչապետը աշխատանքի և սոցիալական հարցերի, առողջապահության նախարարներին հանձնարարեց մեկ ամսվա ընթացքում համատեղ մշակել և կառավարության աշխատակազմին ներկայացնել բժշկասոցիալական փորձաքննության ոլորտի որակապես փոփոխմանն ուղղված առաջարկություններ`հստակ անդրադարձ կատարելով փորձաքննությունների կազմակերպման ընթացակարգերին, մոնիտորինգային համակարգին և բժիշկ փորձագետին ներկայացվող պահանջների վերանայման ոլորտային պատասխանատվության շրջանակի հստակեցման, ինչպես նաև գործընթացի թվայնացման և էլեկտրոնային առողջապահության համակարգին համակցման հարցերին:

«Նախնական քննարկել ենք սա աշխատանքի և սոցիալական հարցերի  և առողջապահության նախարարների հետ, այն ուրվագիծը, որ իրենք առաջարկում են, սկզբունքորեն, որակապես փոխելու է այդ ոլորտը, այնպես որ` մեկ ամսվա ժամկետի մեջ վստահ եմ, որ կստանանք նոր խաղի կանոններ»,- ասաց Կարապետյանը: