Ինքնակամ կառուցված ձկնաբուծարաններին արտոնություններ կտրվեն. վարչապետը հանձնարարական տվեց

Այսօր կառավարության նիստում վարչապետ Կարեն Կարապետյանը հանձնարարական տվեց ինքնակամ կառուցված ձկնաբուծական շինությունների օրինականացման գործընթացը պարզեցնելու և համապատասխան արտոնություններ տրամադրելու վերաբերյալ:

«Ձկնաբուծությամբ զբաղվող որոշ տնտեսություններում առկա են ինքնակամ կառուցված ձկնաբուծական շինություններ, որոնք հողամասերի նպատակային նշանակության կարգավիճակի տեսանկյունից պարունակում են անհամապատասխանություններ»,- նշեց վարչապետը և հավելեց. «Հաշվի առնելով ներկայումս գործող կարգավորումները և առկա ֆինանսական բեռը` նշված անհամապատասխանությունների վերացման համար արտոնություններ են նախատեսվում նոր կառուցվող ձկնաբուծական շինությունների համար: Նման շինությունների օրինականացման դեպքում խթանվում է պետական տուրքերի և այլ վճարների ավելացումը»:

Վարչապետը հանձնարարեց գյուղատնտեսության, բնապահպանության, տարածքային կառավարման և զարգացման նախարարներին, ինչպես նաև անշարժ գույքի կադաստի պետական կոմիտեի նախագահին` մեկամսյա ժամկետում ուսումնասիրել և կառավարության աշխատակազմին ներկայացնել առաջարկություններ՝ ձկնաբուծությամբ զբաղվող տնտեսությունների, բացառությամբ Սևան ազգային պարկի տարածքում ինքնակամ կառուցված ձկնաբուծական շինությունների, օրինականացման գործընթացը պարզեցնելու և համապատասխան արտոնություններ տրամադրելու վերաբերյալ: