Մարզի 21 համայնքներում բերքը 100 տոկոսով փչացել է. վարչապետը հանձնարարական տվեց

Կառավարությանն նիստը վարչապետ Հովիկ Աբրահամյանը սկսեց երեկվա` Շիրակի մարզ կատարած իր այցելության մասին տեղեկատվությունից` նշելով, որ այնտեղ (խոսքը կարկուտից տուժած համայնքների մասին է) իրենք ականատես են եղել լուրջ խնդիրների` մարզի 21 համայնքներում բերքը 100 տոկոսով փչացել է:

Հովիկ Աբրահամյանը նաև տեղեկացրեց, որ տարածքային կառավարման նախարարության համայնքային ստորաբաժանումներին, մարզպետարաններին համապատասխան հանձնարարական է տվել, որ ձևավորեն հանձնաժողով` մինչև սահմանված վերջնաժամկետը համայնքների խնդիրներով զբաղվելու համար: «Մինչև կառավարության հաջորդ նիստի օրը աշխատեք, հաշվարկեք կորուստների չափերը, որ կառավարությունը կարողանա միջոցներ ձեռնարկել»,- ասաց նա:

Վարչապետը հայտնեց, որ արդեն տեղեկատվություն կա, որ Ստեփանավանում ևս կարկուտը մեծ վնասներ է հասցրել, և ինքը գյուղատնտեսության նախարար Սերգո Կարապետյանին հանձնարարել է անձամբ մեկնել այնտեղ: