Կառավարությունը նախատեսում է կրճատել նախածննդյան ոչ աշխատանքային օրերի թիվը

Կառավարությունը նախատեսում է կրճատել նախածննդյան ոչ աշխատանքային օրերի թիվը: Այս մասին հարցը ներառված է կառավարության այս շաբաթվա նիստի օրակարգում: Ըստ փաստաթղթի հիմնավորման, նախածննդյան տոների ոչ աշխատանքային հանդիսանալը նպատակահարմար չէ սոցիալ-տնտեսական տեսանկյունից։

 Փոփոխությամբ առաջարկվում է, 2001 թվականի հունիսի 24-ի ՀՕ-200 օրենքի 1-ին հոդվածից հանել «հունվարի 3-ին, 4-ին և 5-ին (նախածննդյան տոներ)» բառերը, ինչը նշանակում է, որ ամանորից հետո հունվարի 3-ից սկսած աշխատանքային օրեր են:

Հայաստանում համաձայն ՀՀ աշխատանքային օրենսգրքի  158-159-րդ հոդվածների, ամենամյա նվազագույն արձակուրդի տևողությունը 28 օրացույցային օր է` այդ ընթացքում պահպանվում է աշխատատեղը և վճարվում միջին աշխատավարձը:

Սրան գումարենք  15 ոչ աշխատանքային օր` ազգային տոներ և հիշատակի օրեր, ստացվում է նվազագույնը  43 վճարվող հանգստյան օր տարեկան:

ՀՀ աշխատանքային օրենսդրությամբ ՀՀ քաղաքացուն տրամադրվող վճարվող ոչ աշխատանքային օրերի թիվը արդեն իսկ գերազանցում է շատ զարգացած և առավել ևս զագրացող երկրներում առկա վճարվող ոչ աշխատանքային օրերի թիվը։

Նախագծի ընդունումը միտված է պետության սոցիալական-տնտեսական և ֆինանսական համակարգերի նորմալ կենսագործունեության ապահովմանը։