Նման հարց եւ բանակցություն չկա. Տոնոյանը` «Ելք»-ի հետ միասնական վարչապետի թեկնածուով հանդես գալու մասին

ԱԺ «Ծառուկյան» խմբակցության պատգամավոր Իվետա Տոնոյանն այսօր խորհրդարանում լրագրողների հետ զրույցում հերքեց մամուլում տարածված այն տեղեկությունները, թե «Ծառուկյան» և «Ելք» խմբակցությունների միջև քննարկումներ ու բանակցություններ են ընթանում 2018-ին վարչապետի միասնական թեկնածուով հանդես գալու վերաբերյալ:

«Նմանատիպ որևէ բանակցություն և գործընթաց չկա: Առիթ եղել է ասելու, որ ընդհանրապես վարչապետի թեկնածության հետ կապված հարց այսօր «Ծառուկյան» խմբակցության օրակարգում չկա: Երբ լինեն քննարկումներ, երբ լինի այդ հարցի հետ կապված նոր ասելիք, մենք անպայմանորեն լրատվամիջոցներին և հանրությանը տեղյակ կպահենք»,- ասաց Իվետա Տոնոյանը:

Իսկ արդյո՞ք կոալիցիա կկազմեն ՀՀԿ-ի հետ, թե՞ ոչ, պատգամավորը դարձյալ նշեց, որ իրենց օրակարգում նման հարց չկա:

Ինչ վերաբերում է վարչապետ Կարեն Կարապետյանի կառավարության քննադատությանը, ապա Իվետա Տոնոյանն ասաց, որ ԲՀԿ-ի և «Ծառուկյան» խմբակցության պատգամավորների քննադատությունները երբեք ինքնանպատակ չեն եղել, այլ բխել են հասարակությանը հուզող խնդիրներից: Նրա խոսքով` իրենք ունեն իրենց քաղաքական օրակարգը և առաջնորդվում են միայն իրենց օրակարգով:

«Հնարավո՞ր է ԲՀԿ-ն սատարի Սերժ Սարգսյանին` որպես վարչապետի թեկնածուի» հարցին Տոնոյանը պատասխանեց, որ ինքը «հնարավոր է, գուցե» ձևակերպումներով հարցերին չի պատասխանում, բացի այդ` նշեց, որ վարչապետի հարց իրենց օրակարգում չկա: