Մարկեդոնովը կոչ է արել ռուսական հեռուստաալիքներին` դադարեցնել Հայաստան-ԵՄ համաձայնագրի հետ կապված հիստերիան

Ռուսաստանցի հայտնի քաղաքագետ, կովկասագետ Սերգեյ Մարկեդոնովը կոչ է արել դադարեցնել Հայաստան-ԵՄ համաձայնագրի ստորագրման կապակցությամբ ռուսական ալիքներում բարձրացված հիստերիան. հայտնում է Новости Армения-ն:

«Պաշտոնական մակարդակով Կրեմլը չի խոչընդոտել Հայաստանի և ԵՄ-ի միջև համաձայնագրի ստորագրմանը: Ավելին` երբ փաստաթղթի վերաբերյալ բանակցությունները  մեկնարկել են 2015-ին, տեղյակ է եղել բոլոր նրբություններին»,- գրել է նա իր ֆեյսբուքյան էջում:

Մարկեդոնովի խոսքով` ՀՀ նախագահ Սերժ Սարգսյանը Բրյուսել այցից առաջ եղել է Մոսկվայում և հանդիպել ՌԴ նախագահ Վլադիմիր Պուտինի հետ: «Թվում էր, թե ամեն բան նորմալ է: Եթե այդպես է, ապա ինչի՞ համար է այդ հիստերիան ռուսական հեռուստաալիքներում «ոչ հավատարիմ կնոջ» և «ֆաշիստ Նժդեհի» մասին»,- գրել է նա:

Նշենք, որ ռուսական Звезда, ОРТ, НТВ հեռուստաալիքների եթերում բուռն քննադատության էր ենթարկվել Հայաստանի քայլը: