ՌԴ ԿԳ նախարարի` Հայաստան այցի շրջանակներում 3 ուղղության վրա ենք շեշտը դնելու. Լևոն Մկրտչյան

Ռուսաստանի կրթության և գիտության նախարար Օլգա Վասիլևայի` Հայաստան այցի շրջանակներում երեք ուղղության վրա է շեշտը դրվելու. լրագրողների հետ զրույցում ասաց ՀՀ ԿԳ նախարար Լևոն Մկրտչյանը` խոսելով ՌԴ ԿԳ նախարարի այցի առաքելության մասին:

Նա տեղեկացրեց նաև, որ Վասիլևայի հետ պայմանավորվել են հատուկ շեշտադրում անել բնական գիտությունների և ինժեներատեխնիկական ուղղությամբ: «Երեք հիմնական ուղղությամբ ենք համագործակցելու` ինժեներատեխնիկական, միջուկային ֆիզիկայի և բնական գիտությունների: ՌԴ-ի մեր գործընկերները, հատկապես` գիտական հաստատությունները, շատ ավելի սերտ համագործակցություն կսկսեն մեզ հետ: Բացի այդ` փոքրաթիվ աշակերտներ ունեցող դպրոցների մեթոդիկայի հարցում կլինի համագործակցություն, մենք կվերցնենք Ֆինլանդիայի և ՌԴ-ի փորձը, քանի որ Ռուսաստանում էլ փոքրաթիվ աշակերտներ ունեցող մեծ թվով դպրոցներ կան»,- ասաց Մկրտչյանը:

Հարցին, թե «Ռուսաց լեզու» առարկայի դասագրքերից մեկում գրված է «նեգր», և որքանո՞վ է սա էթիկապես ճիշտ, Մկրտչյանը պատասխանեց, որ եթե, իրոք, նման բան կա, աններելի սխալ է: «Պետք է անպայման նայել սա, ճշտել»,- ասաց նա: