Ամոթ այն երկրներին, որտեղ ՄԻԱՎ/ՁԻԱՀ-ից կարող են մարդիկ մահանալ. Արա Բաբլոյան

«Մարդու իմունային անբավարարության վիրուսից առաջացած հիվանդության կանխարգելման մասին» Հայաստանի Հանրապետության օրենքում փոփոխություններ կատարելու մասին ՀՀ օրենքի նախագծի քննարկման ժամանակ ելույթով հանդես եկավ նաև ԱԺ նախագահ Արա Բաբլոյանը` հաշվի առնելով նախագծի մասնագիտական բնույթը:

«Գնամ մասնագիտական դաշտ, հետո հետ կգամ քաղաքական դաշտ»,- ասաց նա և խոսեց նախագծի ընդունման անհրաժեշտության մասին:

Բաբլոյանը հայտնեց, որ 5-րդ գումարման խորհրդարանը նույնպես անդրադարձել է այս հարցին և ինքը` որպես զեկուցող, ներկայացրել է այդ նախագիծը: Նրա խոսքով` մարդու իմունային անբավարարության վիրուսից առաջացած հիվանդության կանխարգելման առանձին կարգ մշակելու կարիք չկա:

«Խնդիրը մեր մեջ է, եթե որևիցե մեկը որոշի գալ Հայաստան` բուժօգնություն ստանալու, կգա, երբ որ մենք հատուկ կարգ ենք մտցնում, նշանակում է խտրականություն ենք մտցնում: Այս նախագծով մենք հանում ենք խտրականությունը և գնում ենք համահունչ ցիվիլ աշխարհին, ոտք ենք մեկնում Եվրոպայի հետ»,- ասաց ԱԺ նախագահը` խորհուրդ տալով չբարդացնել իրավիճակը:

«Ամոթ է այն երկրներին, որտեղ ՄԻԱՎ/ՁԻԱՀ-ից կարող են մարդիկ մահանալ»,- հավելեց նա` կարևորելով մարդու իմունային անբավարարության վիրուսից առաջացած հիվանդության կանխարգելումը: