Էլեկտրաէներգիայի շուկայի ազատականացմամբ խթանել միջսահմանային առևտուրը

Կառավարության այսօրվա նիստում հաստատվեց էլեկտրաէներգետիկական համակարգի էլեկտրաէներգիայի շուկայի ազատականացման և միջպետական առևտրի զարգացման միջոցառումների ծրագրի ժամանակացույցը:

ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը նշեց, որ երկրի անկախացումից ի վեր Հայաստանը որդեգրել է ազատական տնտեսության գաղափարը, ազատականացվել են բոլոր հիմնական շուկաները և այսօր միակ շուկան, որն ազատականացված չէ, էլեկտրաէներգիայի շուկան է:

«Հանրային ծառայությունները կարգավորող հանձնաժողովն ընդունել է որոշում, որով ձևավորվել է ազատ շուկայի օպերատորը՝ ի դեմս հաշվարկային կենտրոնի: Այսօր ԱՄՆ ՄԶԳ-ի հետ համատեղ իրականացվում են մասնագետների պատրաստման դասընթացներ: Այնուհետև ՀԾԿՀ-ի կողմից համակարգի ցանցային կանոնները հաստատվեցին։ Այսօրվա որոշմամբ հաստատվում է այն քայլերի բովանդակությունն ու ժամանակացույցը, որոնցով պետք է առաջնորդվենք շուկայի ազատականացման և էլեկտրաէներգիայի միջսահմանային առևտուրը խթանելու հարցում»-ասաց նախարարը։

Նախագծի ընդունմամբ հնարավորություն կընձեռվի ոլորտում միջպետական առևտրի զարգացմանը և կխրախուսվի ավելի լայն մրցակցություն: