Կա ներկայացված հայտ կամ հայտեր. Սունդուկյանի թատրոնը նոր տնօրեն կունենա

Գ. Սունդուկյանի անվան ազգային ակադեմիական թատրոն պետական ոչ առևտրային կազմակերպության տնօրենի թափուր պաշտոնը զբաղեցնելու համար մրցույթ է հայտարարվել: Թատրոնի` արդեն իսկ նախկին տնօրենը` Ստեփան Դավթյանը, բոլորել է իր 65-րդ տարին, և, ըստ օրենքի, այլևս չի կարող պաշտոնավարել:

Yerkir.am-ի հետ զրույցում մշակույթի նախարարի մամուլի քարտուղար Ռուզաննա Խաչատրյանը նշեց, որ Սունդուկյանի անվան թատրոնի տնօրենի թափուր պաշտոնը զբաղեցնելու համար արդեն իսկ կա ներկայացված հայտ կամ հայտեր: Իսկ թե ով կամ ովքեր են դիմել այդ հաստիքի համար` անունը կամ անունները հայտարարել դեռ չեն կարող:

Ի դեպ, հայտադիմումներն ընդունելու վերջնաժամկետը հուլիսի 28-ն է:

Հիշեցնենք, որ Սոս Սարգսյանի անվան համազգային թատրոնի տնօրեն Վարդան Մկրտչյանը նշանակվել է Սունդուկյանի անվան թատրոնի տնօրենի ժամանակավոր պաշտոնակատար: Համազգային թատրոնի տնօրենի գործառույթները կատարում է թատրոնի նորանշանակ գեղարվեստական ղեկավար Վիգեն Չալդրանյանը:

Մշակույթի նախարարի մամուլի քարտուղարը տեղեկացրեց նաև, որ Համազգայինի տնօրենի ընտրության մրցույթ դեռ չի հայտարարվել: