Որևէ մեկին մեր երկրի հեղինակության հետ խաղալու իրավունք տրված չէ. նախարարը՝ կեղծ վկայականների մասին

Որևէ մեկին իրավունք չի տրված մեր երկրի հեղինակության հետ խաղալու. ԱԺ-ում լրագրողների հետ զրույցում նշեց ՀՀ ԿԳ նախարար Լևոն Մկրտչյանը՝ անդրադառնալով ԱԱԾ-ի պահանջին:

«Այդ նյութերը ապացուցվելուց հետո լիցենզիոն և հավատարմագրման վերանայման գործընթաց է սկսելու: Որևէ մեկն իրավունք չունի մեր պետության կրթական համակարգի որակը դնել հարցականի տակ: Եթե չեն կարող աշխատել, պետք է գնան վերամիավորման, ոչ թե այդ ճանապարհով իրենց հարցերը լուծեն: Դա անընդունելի է»,- ընդգծեց նախարարը:

«Մասնավոր բուհերը փակվելո՞ւ են» հարցին էլ պատասխանեց, որ եթե ապացուցվում է՝ ԲՈւՀ-ի ռեկտորն անձամբ վաճառում է վկայական, պետք է զրկվի իր լիցենզիայից: Նախարարը նաև նշեց` եթե նման փաստ լինի` պետական ԲՈՒՀ-երի հետ կապված, ապա դրանք էլ կզրկվեն լիցենզիաներից:

Հիշեցնենք՝ Հայաստանի ԱԱԾ-ն ԿԳ նախարարությունից պահանջել է միջոցներ ձեռնարկել ոչ պետական բուհերում հայտնաբերված խախտումները վերացնելու եւ հետագայում բացառելու ուղղությամբ: Պատճառը ոչ պետական 3 բուհերի կողմից դասընթացներին չմասնակցած, առանձին դեպքերում նաեւ ընթացիկ ու ավարտական քննություններին չներկայացած անձանց կեղծ ավարտական դիպլոմներ հատկացնելն է: Հարուցված քրեական գործերով պարզվել է, որ Հայաստանի եւ այլ երկրների 20 քաղաքացու շահադիտական դրդումներով կեղծ դիպլոմներ են տրվել: Դատարանի որոշմամբ` ռեկտորներից երկուսը մեղավոր են ճանաչվել, երրորդի վերաբերյալ էլ նախաքննությունը շարունակվում է: