Միակողմանի ներկայացված նյութ էր. նախարարը՝ թիվ 1 տուն-ինտերնատի վերաբերյալ տեսանյութի մասին

Թիվ 1 տուն-ինտերնատի վերաբերյալ լրատվամիջոցներում հրապարակված տեսանյութը միակողմանի է ներկայացված. լրագրողներին ասաց ՀՀ աշխատանքի և սոցիալական հարցերի նախարար Արտեմ Ասատրյանը:

«Շատ միակողմանի ներկայացված նյութ էր: Եթե իրականությունը տեսնելու ցանկությունը լիներ, պետք է բոլոր սենյակներն այցելեին, այդ թվում` և վերանորոգվածները»,- ասաց նա:

Ասատրյանը նշեց, որ նախարարությունը երբեք չի փորձել համակարգում առկա խնդիրները քողարկել: «Խնդիրներն ինքներս ենք բարձրացնում, և խնդիրների լուծումներ տվողը նորից մենք ենք»,- նշեց նա:

Նախարարի պնդմամբ՝ իրենք քայլ առ քայլ իրականացնում են իրավական փոփոխություններ, որոնք կյանքի կոչելու համար ժամանակ է պետք: «Կատարվո՞ւմ են քայլեր, իհարկե, կատարվում են, բավարա՞ր են, կարծում եմ՝ դեռ ոչ, բայց այդ ուղղությամբ, վստահեցնում եմ, աշխատանքները շարունակական են լինելու»,- ասաց նա:

Անդրադառնալով  տարեցներին տրամադրվող սննդին ՝ նախարարը նշեց. «Դրա վերաբերյալ շատ պարզաբանումներ են ներկայացվել, բայց ասեմ` եթե դուք ուզում եք կերակուրից լափ ստանալ և ներկայացնել, ապա կներկայացնեք, եթե ուզում եք կերակուր ներկայացնել, ապա կերակուր կներկայացնեք: Չեմ կարծում, որ ձեր բերած օրինակը որևէ բան էր նշանակում»,- ասաց նախարարը:

Հարցին էլ՝  կերակուրի սահմանված չափորոշիչներ չկա՞ն, նա պատասխանեց. «Կան չափորոշիչներ, և դրանք պետք է պահպանել: Այդ չափորոշիչների շրջանակում իրականացվող խնամքը մեր մշտադիտարկման ներքո պահելով՝ մենք կունենանք այն արդյունքները, որ այլևս որևէ շեղում այդ չափորոշիչներից տեղի չունենա,- ասաց Ասատրյանը: