Ես հեռացողի նմա՞ն եմ. Վարդան Հարությունյան

Ես հեռացողի նմա՞ն եմ. այսպես արձագանքեց ՊԵԿ նախագահ Վարդան Հարությունյանը հարցին՝ ի՞նչ զգացողություններ ունի` իրենց կառավարությունը հեռացո՞ղ կառավարություն է:

Նշենք, որ երբ վարչապետ Կարեն Կարապետյանը ԱԺ-ում ներկայացնում էր կառավարության ծրագիրը, մասնավորապես «Ելք» դաշինքը  հայտարարեց, որ վարչապետի կառավարությունը նման է հեռացող կառավարության:

«Ես այնտեղ եմ, որտեղ կցանկանա մեր թիմը: Եթե նպատակահարմար կգտնեն, որ այստեղ պետք է լինեմ, կլինեմ, եթե ոչ՝ ոչ»,- ասաց Հարությունյանը:

Երբ հետաքրքվեցինք, թե ո՞վ է նրա թիմը, բացի վարչապետից, պատասխանեց, թե բոլորը:

Հարցին՝ ինքը Սերժ Սարգսյանի՞ թիմից է, թե՞ Կարեն Կարապետյանի, Հարությունյանը պատասխանեց, որ դա նույն թիմն է:

Դիտարկմանն էլ՝ Կարեն Կարապետյանի օրոք ՊԵԿ նախագահ նշանակվեցիք, արձագաքնեց. «Այդ պահին են նպատակահարմար գտել ինձ այդտեղ նշանակել: Ո՞վ է ասում, որ այդ պաշտոնը հավերժ է, կամ ո՞վ է ասում, որ ես կառչած եմ այդ պաշտոնից»:

Հարությունյանը հավելեց, որ ընդհանրապես կառչած չէ պաշտոնից, և որ թիմի պահանջն է, որ ինքն այդտեղ լինի: