ՊԵԿ-ն իմ մարդկանցով եմ համալրելու. Վարդան Հարությունյան

ՊԵԿ նախագահ Վարդան Հարությունյանն այսօր Ազգային ժողովում լրագրողների հետ զրույցում անդրադարձավ այն խոսակցություններին, թե երկար ժամանակ չի համաձայնել լինել ՊԵԿ նախագահ: Նա նշեց, որ նման բան չի եղել:

Հարությունյանը հայտնեց, որ ՊԵԿ-ում տեղի են ունենում կադրային փոփոխություններ: «Իմ մարդկանցով եմ համալրում, համալրում եմ պրոֆեսիոնալ մարդկանցով, և էլի են կատարվելու փոփոխություններ. այն մարդիկ, ովքեր իմ կողմից դրված խնդիրները չեն կարողանալու իրականացնել, միանշանակ, չեն լինի իմ թիմի անդամ»,- ասաց նա, ապա հավելեց. «Նախկին աշխատողներն էլ էին պրոֆեսիոնալ, բայց եկեք հասկանանք, որ խաղի կանոն է փոխվել, և այդ խաղի կանոնը ես եմ ֆիքսում և պետք է աշխատեմ այն թիմի հետ, որին ես կընտրեմ»:

Իսկ թե խոսքն ի՞նչ կանոնի մասին է, Հարությունյանը չցանկացավ մանրամասնել:

Հարցին՝ թե ի՞նչը ստիպեց նրան ավելի բարձր աշխատավարձով աշխատանքը թողնել և ՊԵԿ նախագահ աշխատել, նա պատասխանեց. «Վարչապետի առաջարկը և իմ սկզբունքները»: