2 երեխա եմ ունեցել, չեմ ծառայել, եթե դա մեղք ա՝ ներողություն եմ խնդրում. Վարդան Հարությունյան

ՊԵԿ նախագահ Վարդան Հարությունյանն այսօր խորհրդարանում լրագրողների հետ զրույցում անդրադարձավ իր՝ բանակում չծառայալու պատճառներին: Նա նշեց, որ չի ծառայել բանակում, որովհետև բուհն ավարտելիս 2 երեխա է ունեցել։

«1991 թվականին ընդունվել եմ բուհ, ավարտել եմ 1996 թվականին և ավարտելուց ունեցել եմ 2 որդի ու ազատվել եմ բանակից։ Եթե դա մեղք ա, մեղք եմ գործել, ներողություն եմ խնդրում հասարակությունից»,- ասաց Հարությունյանը։

Դիտարկմանը՝ ուրեմն բանակից խուսափելու համար մարդիկ կարող են 2 երեխա ունենալ ու հեշտությամբ ազատվել բանակից, պատասխանեց. «Է թող ունենան»։

Համաձայն «Զինապարտության մասին» ՀՀ գործող օրենքի` պարտադիր զինվորական ծառայության զորակոչից ընտանեկան դրության բերումով տարկետման իրավունք ստանում է 18 տարին լրացած այն զորակոչիկը, ով ունի 2 և ավելի երեխա, կամ նրա կինը 2-րդ երեխայով կամ զույգ երեխայով վեցամսյա հղի է: