ԱԺ-ն կառավարության նախագծերը կընդունի հրատապ ռեժիմով

Շարունակվում է ԱԺ արտահերթ նիստը: Կառավարության կողմից 6 նախագիծ է ներկայացվել ԱԺ քննարկմանը և հաստատմանը: Արդարադատության փոխնախարար` հիմնական զեկուցող Արթուր Հովհաննիսյանը նշեց, որ դրանք պահանջում են հատուկ ընթացակարգով հրատապ քննարկում և ընդունում, քանի որ հակառակ դեպքում ժամանակավրեպ կլինեն:

«Ծառուկյան» դաշինքից պատգամավոր Նաիրա Զոհրաբյանը հարց ուղղեց Հովհաննիսյանին` արդյո՞ք երկրորդ ընթերցմանն էլ է վերաբերում հրատապ քննարկումը, քանի որ ինքը կարծում է, որ հատկապես «Պետական պաշտոններ զբաղեցրած անձանց սոցիալական երաշխիքների մասին» ՀՀ օրենքում փոփոխություն կատարելու մասին նախագիծը պահանջում է երկարատև քննարկում:

Հովհաննիսյանն արձագանքեց. «Ես կարծում եմ, որ հենց թոշակների հետ կապված նախագիծը հրատապ է, եթե դա լինի հուլիսից հետո, օրենքները հետևանք չեն ունենա, դրա համար է մշակվել փոփոխության նախագիծը»:

Մտքերի փոխանակման ժամանակ էլ «Ելք» դաշինքից պատգամավոր Էդմոն Մարուքյանը նշեց, որ դժգոհ են կառավարության այս առաջարկից, և առաջարկեց, որ խորհրդարանը բոլոր նախագծերին դեմ քվեարկի, քանի որ կառավարության այս քայլը անհարգալից վերաբերմունք է խորհրդարանի հանդեպ:

ԱԺ փոխնախագահ Արփինե Հովհաննիսյանը արձագանքեց Նիկոլ Փաշինյանին և Էդմոն Մարուքյանին` նշելով, որ բոլոր նախագծերն էլ հրատապության ռեժիմի մեջ են, հակառակ դեպքում կարող է հավելյալ ծախսեր բերել բյուջեին: «Մենք գուցե պետք է փոխենք կանխավարկածը, դրանով մեկ ժամ է օրենսդրական նախաձեռնության քննարկումների տևողությունը, ԱԺ կանոնակարգ-օրենքի 62 հոդվածը այդպես է սահմանում»,- ասաց նա:

Նախագծերի հրատապ քննարկման և ընդունման հարցը դրվեց քվեարկության և ընդունվեց ձայների` 60 կողմ, 27 դեմ, 0 ձեռնպահ հարաբերակցությամբ: