Էլեկտրոնային փաստաթղթերն ու ստորագրությունները կներդրվեն պետական մարմիններում

Այսօր կառավարության նիստում կառավարության աշխատակազմի ղեկավար Դավիթ Հարությունյանը ներկայացրեց որոշում`պետական մարմիններում էլեկտրոնային փաստաթղթերի և էլեկտրոնային թվային ստորագրությունների կիրառման կարգը սահմանելու, էլեկտրոնային թվային ստորագրության կիրառմամբ պետական և տեղական ինքնակառավարման մարմինների կողմից մատուցվող ծառայությունները կամ գործողություններն էլեկտրոնային ձևով ձեռք բերելիս շահագործվող էլեկտրոնային համակարգերի տեխնիկական ընդհանուր պահանջները սահմանելու մասին:

Վարչապետ Կարեն Կարապետյանը հարկ համարեց հստակեցնել,, որ այսօր Հայաստանի քաղաքացիներին առաջարկվում է էլեկտրոնային գործիքակազմ: Բայց այս դաշտը կաշխատի այն դեպքում, երբ մեծանա այն քաղաքացիների թիվը, ովքեր կցանկանան օգվել այդ ծառայությունից:

«Մենք կկարողանա՞նք համաչափ լցնել այդ դաշտը, որպեսզի քաղաքացուն տրամաբանական ու ձեռնտու լինի գալ այդ դաշտ»- հարցրեց վարչապետը:

Դավիթ Հարությունյանը պատասխանեց, որ ներկայացվող նախագծով հստակեցվում է պետական այն մարմինների շրջանակը, որոնք այդ ծառայությունը կմատուցեն, կինտեգրվեն այդ համակարգին: Պետական մարմիններին կհետևեն բանկերը, այդպես է ցույց տալիս  միջազգային փորձը, իսկ երրորդ փուլում այդ համակարգին կմիանա մասնավոր հատվածը: Դավիթ Հարությունյանը նշեց, որ երկու համակարգ արդեն իսկ կիրառում է այն` առողջապահության և արդարադատության համակարգերը: