Աշխատող բիզնեսի մոտ պրոգրեսիվ գույքահարկը ջնջվում է. Կարեն Կարապետյան

Այսօր կառավարության հերթական նիստում վարչապետի ժամանակավոր պաշտոնակատար Կարեն Կարապետյանն օրակարգին անցնելուց առաջ անդրադարձավ հանրապետության տարածքում պարապուրդի մատնված գույքին: Վարչապետի խոսքով` կառավարության ծրագրով նախատեսված է ներդնել նոր մեխանիզմներ` խթանելու պարապուրդում գտնվող գույքի մասնակցությունը տնտեսությունում ավելացված արժեքի ստեղծման հետ կապված:

Նա ֆինանսների նախարար Արամյանից հետաքրքրվեց, թե ինչ աշխատանքներ են կատարվել այդ հանձնարարականի ուղղությամբ: Վարդան Արամյանը նշեց, որ օգտագործվել է կառավարության ծրագրի հիմքում դրված սկզբունքը, այն է` խթանիչ մեխանիզմներ ստեղծել այն գույքի համար, որը պոտենցիալ կարող է ստեղծել տնտեսության զարգացման համար, հակառակ դեպքում` ծախսատար է նման գույք պահելը:

«Մենք այդ մոտեցումները նայել ենք գույքահարկի շրջանակներում, կատարել ենք բազմաթիվ վերլուծություններ ու հաշվարկներ: Հաջորդ շաբաթ ձեզ կներկայացնենք բոլոր հաշվարկները»,- ասաց ֆինանսների նախարարը:

Վարչապետը հանձնարարեց նաև Երևանի քաղաքապետին` քննարկել հատուկ հարկային գոտի ստեղծելու մասին հարցը: Նրա խոսքով` բիզնեսը, որն աշխատում է, չպետք է լրացուցիչ բեռ ստանա, և բիզնեսը, որը չի աշխատում, պետք է գնա պրոգրեսիվ գույքահարկի ճանապարհով:

«Աշխատող բիզնեսի մոտ պրոգրեսիվ գույքահարկը ջնջվում է, չաշխատող բիզնեսի մոտ այդ բեռն առաջանում է: Երևանի կենտրոնի համար որոշակի ժամանակ պետք է տրամադրենք բիզնեսին, եթե այդ գույքը աշխատեցնելու են, ապա պրոգրեսիվ գույքահարկը չենք կիրառելու»,- ասաց Կարեն Կարապետյանը: