Չէի ուզում գալ ԱԺ, Ծառուկյանն ասաց՝ արի. Արարատ Զուրաբյան

«Ծառուկյան» դաշինքից պատգամավոր ընտրված Արարատ Զուրաբյանը չի ուզեցել գալ խորհրդարան, Գագիկ Ծառուկյանն  է ասել` արի: Այս մասին այսօր խորհրդարանում լրագրողներին ասաց նորընտիր պատգամավորը:

«Ճիշտն ասած` ես գտնում էի, որ չարժե, շատ մարդիկ էին պնդում, որ պետք ա գալ, որոշեցի գալ: Կարծում եմ, որ մտադրություն ունենամ գնալու, ցանկացած պահի կարող եմ գնալ»,- ասաց նա՝ հավելելով, որ, ի տարբերություն այլ պատգամավորության թեկնածուների, ինքը որևէ պարտավորություն, պայմանավորվածություն չի ունեցել:

«Հրաժարվելու որևէ պարտավորություն չունեմ: Ինքնս կարող եմ որոշել՝ թողնել մանդատը, թե` վերցնել, էլի թողնել մանդատը, չվերցնել մանդատը և այլն»,- նշեց Զուրաբյանը՝ շարունակելով խոսքը. «Ես խոսել եմ Ծառուկյանի հետ, նա ինձ առաջարկել է վերցնել մանդատը, որից հետո գտել եմ, որ պետք է վերցնեմ, բայց վերցնելուց հետո միանգամից փոշմանել եմ, որովհետև մինչև վերջ որևէ մեկդ ցանկություն չեք ունենում լսել մարդկանց և ամբողջությամբ ներկայացնել այն, ինչ ասվում է: Շատ դժվար է լսել, որ դու ինչ-որ դավադրության կամ պրոցեսի մասնակից ես, որի մեջ չես եղել կամ հավակնություն չես ունեցել, ընդ որում` կարիք էլ չունես որևէ բանի մասնակից լինելու, որովհետև, էլի եմ ասում, դու չունես որևէ պարտավորություն»:

Պատգամավորը կրկին շեշտեց, որ անձամբ չի ցանկացել խորհրդարանում հայտնվել: «Ես ինքս չէի ցանկանում գալ պառլամենտ, որովհետև կան որոշակի բաներ, որոնք այնքան էլ դուրեկան չեն»,- ասաց նա:

Հարցին՝ մնալը Ձեր որոշելի՞քն է, Զուրաբյանը պատասխանեց. «Իհարկե»: