Առաջիկայում բժշկական ապահովագրություն կունենան նաև սոցիալապես անապահովները

Մայիս ամսին կառավարության հաստատմանը կներկայացվի շուրջ 100 000 պետական ծառայողի հիվանդանոցային բժշկական ծառայությունների ապահովագրական փաթեթներ տրամադրելու մեխանիզմը: Այս մասին լրագրողներին ասաց ՀՀ առողջապահության փոխնախարար Սամվել Մարգարյանը:

Նա տեղեկացրեց նաև, որ հունիսի վերջին էլ ևս 612 000 մարդու ապահովագրական փաթեթ տրամադրելու նախագիծ կներկայացվի կառավարության քննարկմանը. այս անգամ արդեն այն կտրամադրեն սոցիալապես անապահովներին` «Փարոս» համակարգում ընդգրկվածներին և հաշմանդամություն ունեցող անձանց: Ծրագրի մեկնարկը կտրվի 2018-ի սկզբին:

«Պետությունը հաշվարկել է` որքան արժե մեկ անձի ստացիոնար բուժօգնությունը` 38 500 դրամ, և ապահովագրական ընկերությանը կփոխանցվի քաղաքացու բուժումը կազմակերպելու ֆունկցիան: Մարդիկ կկարողանան իրենց բուժումը կազմակերպել իրենց ուզած հիվանդանոցում: Հայաստանի առողջապահության համար անհրաժեշտ է 250 մլրդ դրամ` բոլոր քաղաքացիներին բժշկական ապահովագրություն տրամադրելու համար, սակայն մենք ունենք միայն 85 մլրդ դրամ` այդ իսկ պատճառով էլ չենք կարող միանգամից բոլոր քաղաքացիների բժշկական պաահովագրության հարցը լուծել»,- ասաց Մարգարյանը:

Նա նշեց, որ բյուջեն, բացի ապահովագրության հարց լուծելուց, ունի բազմաթիվ այլ ծրագրեր, ինչի հետևանքով էլ ապահովագրության ներդրումը փուլ առ փուլ են իրականացնում: